Mańǵystaýda bes aıda 1300-deı aýyr qylmys tirkeldi

AQTAÝ. QazAqparat - Mańǵystaý oblysynda 5 aı ishinde aýyr jáne asa aýyr sanatqa jatatyn 1292 qylmys ashyldy, dep xabarlaıdy QazAqparat tilshisi. Bul týraly Qoǵamdyq qaýipsizdikke baılanysty jıynda Polıtsııa departamentiniń basshylyǵy málimdedi.

Jalpy, zańsyz aınalymynan barlyǵy 100-den astam esirtki túrleri tárkilenip, naýryz aıynda esirtki jetkizý jáne satýmen aınalysqan qylmystyq toptyń joly kesildi.

Oblys ákiminiń tapsyrmasyna sáıkes, óńirdegi oıyn mekemeleriniń qyzmetterine tekserý júrgizilip, zańsyz jumys istegen 61 býkmekerlik keńse anyqtalǵan. Saldarynan kóptegen qylmys tirkelgen.

5 aıdyń qorytyndysyna sáıkes, qylmys sany 5,5 % tómendegen. Aýyr qylmys 7,4 % jáne asa aýyr qylmys 14,3 % azaıǵan.

Sonymen qatar, óńirde qaraqshy shabýyly, tonaý, bóten múlikti urlaý, onyń ishinde mal urlyǵy, buzaqylyq syndy qylmystar da birneshe paıyzǵa tómendegen.

Sondaı-aq, jıynda jol qaýipsizdigi, quqyq buzýdyń aldyn alý, qoǵamdyq tártipti saqtaýdy qamtamasyz etýge baılanysty jergilikti polıtsııa qyzmetiniń jumystary talqylanyp, jedel izdestirý qyzmeti, qylmystardy ashý jáne zańsyz esirtki aınalymynyń jolyn kesý, tergeý men anyqtaý qyzmetiniń sapasyn kóterý máseleleri jan-jaqty qaraldy.