Mańǵystaýda balalaryn burynǵy kúıeýinen ala almaı júrgen áıel suhbat berdi
Sot sheshimimen balalaryn alýǵa kelgen anaǵa úlken uly qarsylyq tanytqan. Vıdeodan keıin kópshilik balanyń anasyn kinálap, máselege tıisti organdardyń aralasýyn talap etken.
Degenmen, burynǵy kúıeýimen 13 jyl otasqan onyń aıtýynsha, sot sheshim shyǵarar kezde onyń áleýmettik-turmystyq jaǵdaıyn eskergen.
Erli-zaıyptylardyń ortaq nekesinen 4 bala bar. Úsheýi ákesiniń tárbıesinde, al kenjesi anasynda.
«Qazir Atyraý oblysynda 8 bólmeli úıde ata-anammen birge turamyn. Bir mekemede eden jýyp, saýda-sattyqpen aınalysamyn. Óz kúnimdi kórip, balalarymdy óz qamqorlyǵyma alý úshin ýaqytpen sanaspaı jumys isteýge májbúrmin. Al, balalardyń ákesi dosynyń bergen bir bólmeli qýyqtaı úıin panalap, taksı qyzmetin atqarady. ıAǵnı, ol jumysta bolǵan kezde balalardyń tárbıesimen Orynbasardyń anasy aınalysady. Sot bolatyn kezde psıholog úlken ulymmen sóılesip, onyń meni jaqsy kóretinin aıtty. Biraq ol ákesi men ájesiniń yqpalynan shyǵa almaıdy. Bala óz tańdaýyn jasaı almaı otyr. Keshegi vıdeoǵa baılanysty ýchaskelik polıtseıler «sen ala alasyń, qolyńda atqarý paraǵy bar» degesin men sondaı áreketke bardym. Men balany uryp-soqqan joqpyn. Jurt meni «aqsha kerek bolǵasyn sóıtip jasap jatyr» dep jazypty. Maǵan odan eshteńe kerek emes. Alıment te qajet emes», - deıdi kelinshek.
Al, oyń burynǵy kúıeýi balalaryn anasyna bergisi kelmeıtinin aıtady. Tipti ákeniń tárbıesinde qalǵan uly men qyzy naǵashylarynyń qolyna barǵysy kelmeıtinin jasyrmady.
«Anamyzben birge turǵymyz kelmeıdi. Biz naǵashylarymyzdyń qolyna baratyn bolsaq, ol jumys isteımin dep taǵy da qalaǵa ketip qalady. Biz osynda qala beremiz», - deıdi onyń qyzy.
Al, Munaıly aýdany bilim bólimindegi psıholog aldyn ala jasaǵan boljamy boıynsha, balalar úlkenderdiń aıtýymen júr degen pikir bildirdi.
«Biz balalardyń quqyǵyn qorǵaıtyn organbyz, biraq balalardy anasynan aıyryp quqyǵyn qorǵamaımyz. Kóp jaǵdaıda bala anasymen birge bolýy kerek. Anasy balalarynyń keýdesinen ıterip turǵan joq. Sot bolardan bir kún buryn keldi. Qushaqtaıyn dese, balalar barǵysy kelmedi. Sonda psıholog maman jasaǵan qorytyndyda balalarǵa úlkenderdiń yqpaly áser etkeni jazylǵan. Balalardyń qylyǵy jattandy, úıretýli», - deıdi Munaıly aýdandyq bilim bólimi kámeletke tolmaǵan balalardyń quqyǵyn qorǵaý mamany Altynaı Esbergen.
Esterińizge sala keteıik, buǵan deıin mańǵystaýlyq áıel burynǵy kúıeýiniń qolyndaǵy balalaryn kúshtep alyp ketpek bolǵany jaıly vıdeo áleýmettik jelide tarap ketkenin jazǵan bolatynbyz.
Oqıǵa 2 qazan kúni Basqudyq aýylynda bolǵan. Kelinshek burynǵy kúıeýiniń sot sheshimine qaramastan balalardy bermeı otyrǵanyn aıtyp polıtsııaǵa júginedi. Kámeletke tolmaǵandar isteri jónindegi ınspektor, sondaı-aq ýchaskelik ınspektordyń kómekshisi balalardyń turǵylyqty jerine bardy.
Alaıda, shý shyǵyp, nátıjesinde úsh bala ákesimen birge qalǵan.