Mańǵystaýda aýyr qylmys sany artty

ASTANA. QazAqparat - Mańǵystaýda aýyr qylmys sany artty. Bul týraly oblystyq prokýratýranyń jyl basynan beri atqarǵan jumystary týraly esep berý jıynynda aıtyldy, dep habarlaıdy «Qazaqparat» tilshisi.

Mańǵystaý oblysy prokýrorynyń qylmystyq protsestiń sotqa deıingi satysyn qadaǵalaý basqarmasynyń orynbasary Jandarbek Spannyń málimdeýinshe, oblystaǵy asa aýyr qylmys sany 2016 jylǵa qaraǵanda 5 paıyzǵa artqan.

«Ótken jyly 39 qylmystyq is tirkelse, bıyl 41-ge jetip otyr. Sonymen qatar, aýyr qylmys deregi boıynsha 656 is tirkelgen. Bul byltyrǵymen salystyrǵanda 4 paıyzǵa kóp», - dedi ol.

Esesine, adam óltirý kórsetkishi bıyl 42 paıyzǵa azaıyp otyr. Byltyr 26 is tirkelse, bıyl bul 15-ti kórsetip otyr. Quzyrly organnyń ókilderiniń málimdeýinshe tirkelgen qylmystyń bári ashylǵan. Al jalpy oblys boıynsha bıyl 4 661 qylmystyq is tirkelip, ótken jylǵyǵa qaraǵanda 20 paıyzǵa azaıǵandyǵyn kórsetken.

Rysgúl Ramazanova