Mańǵystaýda aýyl turǵyndary tamshylatyp sýarý ádisin qolǵa aldy

AQTAÝ. QazAqparat – Mańǵystaý oblysyndaǵy Beıneý aýylynyń turǵyny tamshylatyp sýarý ádisi arqyly aýyl kelbetin kórkeıtip, jasyl-jelekti kóbeıtýge úles qosyp júr, dep habarlaıdy QazAqparat tilshisi aýdan ákimdiginiń baspasóz qyzmetine silteme jasap.

Beıneý aýdanyndaǵy «Jaıdarly» úkimettik emes uıymnyń tóraıymy Nabııa Aılashova aýyl ishin kógaldandyrý aıasyndaǵy jobany jeńip alǵan. «Azamattyq bastamalardy qoldaý ortalyǵy «Mańǵystaýdaǵy aýyldyq ÚEU áleýetin arttyrý» jobasyn uıymdastyrǵan bolatyn. Osy joba aıasynda 500 000 teńge grant jeńip aldyq. Qazirgi ýaqytta qajetti qural-jabdyqtar, qubyrlar men materıaldar alynyp, ortalyq saıabaqtaǵy aǵashtardy tamshylatyp sýarý ádisi iske qosyldy.

Osylaısha, aýdandaǵy ortalyq saıabaqty kútip- baptaý jumystaryn qolǵa aldyq», - deıdi Nabııa Aılashova. Búginde olar saıabaqtaǵy 500 aǵashty tamshylatyp sýarý ádisi arqyly baptap otyr. Munda jıde, aqterek, qaratal jáne torańǵyl aǵashtary ósedi.

«Bizdiń óńirimizdiń tabıǵaty shóldi jáne shóleıtti. Onyń ústine Mańyǵstaý tabıǵı aýyz sý qory joq jalǵyz óńir. Búginde jer ıgerýde eń kúrdeli máseleniń biri osy jerlerdi paıdaǵa asyrý. Aýdanymyzda jasyl-jelekti kóbeıtý maqsatynda birshama jumys qolǵa alyndy. Endi solardyń ári qaraı jaıqalyp ósýine jaǵdaı jasaýymyz kerek. Osy maqsatta ortalyqtaǵy aǵashtardy kútip, baptaýda tamyshylatyp sýarý ádisi eń ońtaıly sheshim dep oılaımyn», - degen pikirin bildiredi úkimettik emes uıymnyń tóraıymy.