Mańǵystaýda aýyl turǵyndary buralqy ıtter máselesimen ákimdik aldyna jınaldy

AQTAÝ. QazAqparat – Mańǵystaý oblysy Túpqaraǵan aýdanyna qarasty Saıyn Shapaǵatov aýylynyń turǵyndary buralqy ıtterdiń mal-jandy qaýyp, turǵyndardyń ómirine qaýip týdyryp otyrǵanyna shaǵymdanyp, ákimdiktiń aldyna jınaldy, dep habarlaıdy QazAqparat tilshisi.

«Itter birneshe eshkimdi jedi. Mal úshin kelip turǵan joqpyn. Bular adamǵa qaýip týdyryp otyr. Kórshi balany jaraqattady. Adamdy talap jatyr. Myna halyqtyń jan aıqaıyn kim oılaıdy?! Itti joq qylý kerek. It atpaıdy degen – sumdyq. Bul ıtter úıden shyqqan ıtter emes, kósheniń ıtteri. Qaladan ákelip tógip ketip otyr. Itti atýǵa buryn zań boldy ǵoı, sony qaıtyp engizsin», - dedi aýyl turǵyny Asyltas Qýatbaeva.

Qazir Saıyn Shapaǵatovta 700-den astam buralqy ıt júr. Turǵyndar oqý jyly bastalǵansha ıtterdi azaıtyp, halyqtyń qaýipsizdigin qamtamasyz etýin talap etip otyr.

«Bizde japa-tarmaǵaı burynǵydaı kóshege shyǵyp ıt aýlaý degen joq. 2022 jyldyń naýryz aıynan bastap zańǵa ózgeris engizildi. Biraq, turǵyndardyń talap, aryz, ótinishteri boıynsha ıt aýlaý jumystary júrip jatyr. Bir aptanyń shamasynda turǵyndardan 30 shaǵym tústi. Túpqaraǵan aýdandyq veterınarııa stantsııasy bizge dári-dármek beredi. Dál qazir qolymyzda dári joq. Jýyrda alyp kelemiz», - dedi aýyl ákimi Saıran Qylysh.