Mańǵystaýda aýyl balasy saıystan jeńip alǵan 1 mln teńgesin mektebine syılady

MAŃǴYSTAÝ OBLYSY. QazAqparat – Mańǵystaý oblysynyń Saıótes aýylynda turatyn 4-synyp oqýshysy Azamat Toqsanbaı saıysta utyp alǵan 1 mıllıon teńgeni mektebine syılady, dep habarlaıdy QazAqparat tilshisi.

Bul aqshany ol respýblıkalyq baıqaýda aǵashtan jasalǵan sanamaǵyn usynyp, utyp alǵan bolatyn.

Atalmysh júldeni Azamat Toqsanbaı mektepke aqshalaı tabystamaǵan.

Bilim berýge qajet zamanaýı qural-jabdyqtardy, ınteraktıvti taqta men gúl qumyralaryn satyp alyp, syılaǵan.

Azamat Toqsanbaıdyń bul áreketin aýyldastary da quptap, alǵys jaýdyrdy.

Qazir ol 4-synyp oqýshysy. Sandar álemine tórt jastan bastap qyzyǵýshylyǵy oıanǵan eken.

Alǵashqy sanamaq quralyn ol qashyqtan oqytý kezinde túrli-tústi qaǵazdan jasaǵan.

Keıinirek onyń materıalyn aǵashpen almastyrǵan.

Óziniń aıtýynsha, qazir onyń sanamaqtaryn 1-synyp oqýshylary matematıka sabaǵynda qoldanyp júr.