Mańǵystaýda aýdan jáne qala ákimderine sógis jarııalandy

AQTAÝ. QazAqparat - Búgin Mańǵystaý oblysy ákimi Serikbaı Trumovtyń qatysýymen ótken apparattyq jıynda birneshe laýazymdy tulǵaǵa sógis jarııalap, jaýapty qyzmetkerlerdiń jumys uıymdastyrý sapasynyń tómendigin atap ótti, dep habarlaıdy QazAqparat ákimdiktiń baspasóz qyzmetine silteme jasap.

«Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy boıynsha aýyldarǵa shaǵyn nesıe berý baǵytynyń alǵashqy jarty jyldyqtaǵy oryndalýy barysynyń tómendigine baılanysty oblys ákiminiń orynbasary Baqytjan Qashaqovqa jáne aýyl sharýashylyǵy basqarmasynyń basshysy Serik Qaldyǵulǵa sógis jarııalandy.

Aqtaý qalasynyń ákimi Ǵalymjan Nııazov qala ishindegi jasyl jelekterdiń ýaqytyly sýarylmaýyna baılanysty sógis aldy.

Munaıly aýdanynda tazalyq jumystarynyń ýaqytyly júrgizilmeýi jáne aýdan ishindegi qoqystardyń tazalanbaýyna baılanysty, aýdan turǵyndaryna aýyz sý jetkizýdi júıeli túrde uıymdastyra almaǵan aýdan ákimi Rahat Eltızarovqa da sógis jarııalandy.

Buǵan deıin aýdan ákimine aýmaqtardy sanıtarlyq tazalaý jáne qatty turmystyq qaldyqtardy jınaý boıynsha birneshe ret tapsyrma berilgen bolatyn», delingen habarlamada.

Apparattyq jıynda oblys ákiminiń birinshi orynbasary Álıhan Qyraýbaev óńirdegi jumyspen qamtý jol kartasynyń oryndalysy jóninde baıandady. Mańǵystaý oblysynda jumyspen qamtýdyń jol kartasy sheńberinde 5 350 jumys orny quryldy.

Apparattyq jıyn kezinde Mańǵystaý oblysyndaǵy koronavırýs ınfektsııasyna qatysty epıdemıologııalyq ahýal sóz boldy.

Oblys boıynsha ákimdikter janynan qurylǵan monıtorıng toptar sońǵy 5 kúnde reıd júrgizip, 577 nysandy tekserdi. Nátıjesinde karantın talaptaryn buzǵan 6 nysan ıesine eskertý berildi.