Mańǵystaýda áskerı teńizshiler jaýyngerlik kemelerdi jazǵy kezeńge daıyndap jatyr

AQTAÝ. QazAqparat - Áskerı-teńiz kúshteriniń ártekti kemeler dıvızıonynda teńizshiler kemelerdi jazǵy kezeńge daıyndap jatyr, dep habarlaıdy QazAqparat tilshisi.

Áskerı qyzmetshiler qarý-jaraqtyń jaı-kúıin tekserip jáne anyqtalǵan aqaýlardy joıady. Qarý-jaraq pen áskerı tehnıkany aýystyrý jónindegi is-sharalardy keme, áskerı bólim komandırleri tehnıkamen jumys isteý kezinde avarııalar men buzylýlardyń aldyn alý úshin qaýipsizdik sharalaryn saqtaý sabaǵynan bastady.

Qarý-jaraq pen áskerı tehnıkany aýystyrý bir aı ishinde úsh kezeńde júrgiziledi. Bul is-sharanyń negizgi maqsaty - jazǵy kezeńde joǵary jaýyngerlik daıyndyqty jáne senimdi, úzdiksiz jumysty saqtaý.

Qazirgi ýaqytta dıvızıonda daıyndyq kezeńi aıaqtaldy. Osy ýaqyt ishinde jeke quram kemelerde jáne qaıyqtarda aqaýlardy anyqtady. Sonymen qatar keme tehnıkalyq quraldarynyń jaı-kúıin tekserdi jáne tehnıkalyq jaǵdaı aktisi men aqaýlyqtardy joıý josparyn jasady.

«Jazda kemelerdi aýystyrý aıasynda biz negizgi qozǵaltqyshtar men dızel generatorlarynyń motor maıyn tekserýden jáne aýystyrýdan bastaımyz. Otyn súzgisin jýamyz, qubyrlardyń joǵary qysymdy aýasymen úrleımiz. Biz elektr jabdyqtarynyń, arnaıy quraldar men baılanystardyń jumysyn tekseremiz. Sondaı-aq, kemelerde ornatylǵan qarý-jaraq júıeleri men mehanızmderin aqaýlardy joıý boıynsha jumys júrgizip jatyrmyz», - deıdi materıaldyq-tehnıkamen qamtamasyz etý boıynsha ártekti kemeler dıvızıony komandıriniń orynbasary Qazı Abıev.

Aıta keteıik, búgingi tańda Qazaqstannyń Áskerı-teńiz kúshteri qysqy oqý kezeńinde jaýyngerlik daıyndyq josparyn tolyǵymen oryndady.