Mańǵystaýda áskerı qyzmetkerler marapattaldy
ASTANA. QazAqparat - QR Qarýly kúshteriniń 25 jyldyǵyna oraı Aqtaýda saltanatty jıyn ótti, dep habarlaıdy Mańǵystaý oblysy ákiminiń baspasóz qyzmeti.
Jıynǵa oblys basshysy men orynbasarlary, oblystyń memlekettik organdary men uıymdarynyń basshylary, oblys máslıhatynyń depýtattary, azamattyq qoǵam ınstıtýttarynyń jetekshileri men jastar belsendileri jáne QR Qarýly kúshteriniń ofıtserleri men qyzmetkerleri qatysty.
Mańǵystaý oblysynyń ákimi Eraly Toǵjanov jınalǵandardy merekemen quttyqtady.
«Qazaqta «Erlik - elge uran, urpaqqa ónege» degen sóz bar. Keshegi elimizdi jaýdan qorǵap, urpaq úshin janyn qıǵan ata-babanyń erlik rýhy búgingi Otan qorǵaýshylarǵa úlken úlgi bolary sózsiz. Áskerı qyzmetkerlerimizdi, ardager aǵalarymyz ben atalarymyzdy, QR Qarýly kúshter qataryndaǵy sarbazdarymyzdy, quqyq qorǵaý organdarynyń qyzmetkerlerin jáne barsha mańǵystaýlyqtardy qasıetti Otan qorǵaýshylar kúnimen quttyqtaımyn. Qasıetti eldiń qasıetti azamattary baıraǵymyzdy kókke kóterip, Táýelsiz Qazaqstannyń týy jelbireı bersin!»- dep tilek bildirdi Eraly Toǵjanov.
Munan soń aımaq basshysy qorǵanys salasyna qosqan úlesi úshin jáne áskerı boryshyn óteý kezindegi minsiz qyzmeti úshin áskerı qyzmetshiler men ardagerlerlerdi marapattady. ІІ dárejeli «Minsiz qyzmeti úshin» medalimen qorǵanys isteri departamenti basshysynyń orynbasary, tárbıe jáne ıdeologııalyq jumystar jónindegi bólimniń bastyǵy, podpolkovnık Seıiljan Ersultanuly Bekmuratov, «Armııa generaly Saǵadat Nurmaǵambetov» medalimen Mańǵystaý oblysy ákimi apparatynyń «Aýmaqtyq qorǵanys basqarý qyzmeti jáne jumyldyrý daıyndyǵyn qamtamasyz etý» kommýnaldyq memlekettik mekemesiniń basshysy Marat Jańabaıuly Jaılaýbaev marapattaldy.
ІІІ dárejeli «Minsiz qyzmeti úshin» medali Aqtaý q. qorǵanys isteri basqarmasynyń kadr bóliminiń bastyǵy, kapıtan Talǵat Tezekbaıuly Nurǵazıev, kapıtan, 30153 áskerı bólimi áýe-ınjenerlik qamsyzdandyrý bóliminiń uıymdastyrý-josparlaý qyzmetiniń bastyǵy Madııar Qurashuly Ábdirahmanov, 30153 áskerı bóliminiń komandalyq torap esebi bólimshesiniń bastyǵy, kishi serjant Maqsuthan Egizbaıuly Orazbekov, 29011 áskerı bóliminiń shtabtyq batalonynyń bólimshe komandıri, aǵa serjant Asqar Edilbaıuly Tastaev, , 29011 áskerı bóliminiń materıaldyq-tehnıkalyq qamtamasyz etý batalonynyń júrgizýshisi, kishi serjant Bekbol Oryntaıuly Baıbolovqa berildi. Sondaı-aq, «Memlekettik shekarany úzdik kúzetkeni úshin» medali, kezekten tys áskerı sheni, oblys ákiminiń Alǵys haty da sala mamandaryna tabystaldy.
QR Qarýly kúshteriniń 25 jyldyǵyna arnalǵan saltanatty jıyn merekelik kontsertke jalǵasty.
