Mańǵystaýda aryz bergen 2,5 myń adamnyń nebary 13-i ǵana bankrot dep tanyldy
Jalpy bankrot jarııalaýǵa 2500-ge jýyq adam aryz bergen. Biraq memleket olardyń bárin birdeı bankrot dep tanyǵan joq.
Qazir qaralǵan istiń 250-den astamy tekserilip jatyr. Al talapqa saı kelmegen 2129 boryshkerdiń ótinimi maquldanbaǵan.
Basty sebep - nesıe tarıhynyń talaptarǵa saı bolmaýy.
«Bul rásimniń kelesideı saldary bar: bes jyl ishinde jańa nesıe alýǵa tyıym salynady jáne mundaı azamattardyń ústinen 3 jyl boıy qarjylyq monıtorıng júrgiziledi. Sondaı-aq alıment boıynsha, basqa adamnyń ómiri men densaýlyǵyna keltirilgen zııandy óteý jónindegi, qylmystyq quqyq buzýshylyqtar boıynsha zalaldy óteý jónindegi qaryzdar esepten shyǵarýǵa jatpaıdy. Sonymen qatar, oblys boıynsha 17 jeke tulǵa sot bankrottyǵy rásimi boıynsha sotqa aryz bergen. Onyń ishinde 1 azamattyń aryzy qanaǵattandyrylyp sot sheshimi shyqty», - deıdi Mańǵystaý oblysy boıynsha memlekettik kirister departamentiniń bólim basshysy Bazarbek Baımaǵambetov.
