Mańǵystaýda arnaıy ekonomıkalyq aımaqtardyń ınvestıtsııalyq áleýeti tanystyryldy
AQTAÝ. QazAqparat - Memleket basshysy N.Nazarbaevtyń tapsyrmasyn oryndaý maqsatynda búgin Aqtaý qalasynda Qazaqstandaǵy Arnaıy ekonomıkalyq aımaqtardyń ınvestıtsııalyq áleýetiniń tanystyrylymy ótti, dep habarlaıdy Mańǵystaý oblysy ákiminiń baspasóz qyzmeti.
Halyqaralyq forýmǵa Mańǵystaý oblysynyń ákimi Eraly Toǵjanov, «Kazakh Invest» AQ Basqarma tóraǵasynyń orynbasary Birjan Kaneshev, 12 elden kelgen ınvestorlar jáne Ázerbaıjan, Túrkııa, Iran, Lıtva elderiniń konsýldary qatysty.
Arnaıy ekonomıkalyq aımaq - ekonomıkalyq damýdyń qozǵaýshy kúshi, ınfraqurylymdy damytýdyń mańyzdy faktory.
Memleket basshysynyń Jarlyǵymen elimizde arnaıy ekonomıkalyq aımaqtar qurylǵan edi. Búginde Qazaqstanda ártúrli salalyq baǵyttaǵy 10 arnaıy ekonomıkalyq aımaq bar. Mysaly, «Ońtústik» AEA toqyma ónerkásibinde, «PIT» AEA aqparattyq tehnologııalar boıynsha, «Pavlodar» jáne «Atyraý» AEA-tary hımııa jáne munaıhımııasy boıynsha mamandanǵan. Al, «Aqtaý teńiz porty» arnaıy ekonomıkalyq aımaǵy iske qosylǵannan beri 88 mlrd teńge ınvestıtsııa tartylyp, 241 mlrd teńgeniń ónimi óndirildi. Bıýdjetke 21 mlrd.teńge kóleminde salyqtar tólendi. Aımaqta 15 mekeme belsendi qyzmet etýde jáne 1 144 jumys ornyn quryldy.
Forýmda Aqtaý, Atyraý, Shymkent, Almaty, Taraz, Pavlodar qalalarynyń arnaıy ekonomıkalyq aımaqtary (AEA) tanystyryldy. AEA-daǵy basqarýshy kompanııalardyń basshylary sharaǵa qatysýshy qonaqtardy AEA-tyń erekshe jaǵdaıymen tanystyryp, sátti iske asyrylǵan jobalardy usyndy. Olardyń damý tájirıbesi men bolashaq josparlary týraly aıtyp berdi.
«Kazakh Invest» UK» AQ AEA damytý departamentiniń basqarýshy dırektory Erkejan Ámirhanovanyń aıtýynsha, búginde AEA terrıtorııasynda 160-qa jýyq ınvestıtsııalyq joba júzege asyrylǵan. Onyń 20 paıyzy sheteldik. Qazir AEA alańynda 11 myńnan astam adam jumys isteıdi.
- Mańǵystaý oblysy - óndirisimen qatar, san salasy jedel damý ústindegi birden-bir aımaq. Qazaqstannyń ekonomıkasyn nyǵaıtýǵa oblysymyzdyń qosqan úlesi de zor, qol jetkizgen tabystary da, jetistikteri de az emes. Qazynaly óńirdiń keleshek úshin bergeninen áli bereri mol. Osy forým Qazaqstannyń jańa ınvestıtsııalyq múmkindikterin sizdermen birlese saralaýǵa jol ashady dep senemin, - dedi Mańǵystaý oblysynyń ákimi Eraly Toǵjanov.
Túrkııa, Saýd Arabııasy, Malaızııa, AQSh, Vengrııa jáne basqa elderden kelgen qonaqtar otandyq kompanııalarmen iskerlik qarym-qatynas ornatýǵa jáne odan ári birlesip jumys isteýge qyzyǵýshylyq tanytty.
