Mańǵystaýda ár mektepke bekitilgen prokýror men polıtseı bolady

AQTAÝ. QazAqparat - Mańǵystaýdaǵy ár mektepte ózine bekitilgen prokýratýra qyzmetkeri men polıtsııa ınspektory bolady, dep habarlaıdy QazAqparat tilshisi.

Mańǵystaý oblysynyń quqyq qorǵaý jáne memlekettik organdary arasynda bilim salasyndaǵy ózara yntymaqtastyq týraly úshjaqty memorandýmǵa qol qoıyldy.

Maqsaty - kámeletke tolmaǵandardyń quqyǵyn qorǵaý jáne olarǵa qatysty jasalatyn quqyq buzýshylyqtardyń aldyn alýda tıisti sharalar uıymdastyrý, bilim mekemelerinde balalardyń qaýipsizdigin qamtamasyz etý úshin shara qabyldaý.

«Úshjaqty memorandýmǵa qol qoıylyp, balalardyń quqyǵyn qorǵaý, olardyń arasyndaǵy qylmysty boldyrmaý baǵytynda jumystar júrgiziledi jáne barlyq mektepterge Prokýratýra ókilderi bekitildi. Sonymen qatar mektepterde prezıdentter saılandy. Olar pedagog ujymmen jáne basqa da quzyrly organdarmen birlese otyryp, bala quqyǵyn qorǵaý jóninde jumys atqarady», - deıdi Mańǵystaý obylstyq bilim basqarmasynyń adamgershilik-rýhanı tárbıe jáne ózin-ózi taný bóliminiń basshysy Quralaı Ǵazımova.

Memorandým aıasynda Mańǵystaý oblystyq prokýratýrasy, bilim salasy, polıtsııa departamenti qyzmetkerleriniń qatysýymen oblys ortalyǵyndaǵy mektepterdiń joǵary synyp oqýshylarymen «Tártibiń men quqyǵyń - tulǵalyq qasıettiń aınasy» taqyrybynda kezdesý uıymdastyryldy.

Shara barysynda balalarǵa quqyq buzýshylyq, onyń aldyn alý, qylmys úshin qoldanylatyn jaza túrleri týraly túsinik berilip, suraq-jaýap almasty.

Oqýshylar da quqyqtaný máselesine yntasy joǵary ekenin kórsetti.