Mańǵystaýda Amal merekesi qalaı toılanady

AQTAÝ. QazAqparat - 14 naýryz – Amal merekesine oraı Mańǵystaý oblysynyń aýmaǵynda 30-dan asa mádenı jáne sporttyq is-shara uıymdastyrylady, dep habarlaıdy QazAqparat tilshisi.

13 naýryz kúni Ábish Kekilbaıuly atyndaǵy oblystyq tarıhı-ólketaný mýzeıi alańynda «Amal – Alashqa ortaq mereke» mádenı kópshilik sharasy, Mańǵystaý aýdanyndaǵy «Qarashańyraq» alańynda «Astana sazy» folklorlyq ansambliniń kontserti men Qaraqalpaqstannyń halyq jyraýy Jeńisbek Pııazovtyń keshi ótedi.

Sonymen qatar 13 naýryzda Otpantaý tarıhı mádenı kesheninde sporttyq is-sharalar da uıymdastyrylady.

Onyń ishinde at sherýi, «Oshaq báıge», «Qazaq kúresi», «Kókpar», «Aýdaryspaq» jarystary bar.

Al, 14 naýryz kúni tazy júgirtý, búrkit salý, taı jarys, qunan báıge men alaman báıgesi ótedi.

«Josparlanǵan is-sharalar aıasynda tusaý kesý rásimi, teatrlandyrǵan qoıylymdar, «Sálem – sózdiń atasy» merekelik sharasy men «Qara qazannan dám tatý» mádenı-kópshilik sharasy bolady. Bul is-sharalardyń bári «Qarashańyraq» alańynda ótedi», - dedi Mańǵystaý oblystyq mádenıet, arhıvter jáne qujattama basqarmasynyń bólim basshysy Ásem Áshirova.

Sondaı-aq, mereke aıasynda oblysta Adaı Ata rýhyna quran baǵyshtalyp, as berilip, qurandy jatqa oqýdan qarılar arasynda oblystyq deńgeıdegi jarys ótkizý kózdelip otyr.

«Amal merekesin toılaý tek kontserttik baǵdarlamamen shektelmeıdi. 13 naýryzda qonaq retinde arnaıy Túrkııa, Ázerbaıjan ǵalymdaryn shaqyrttyq. Onyń ishinde elimizdiń de belgili ǵalymdary bar. Qonaqtardy Otpantaý tarıhı-mádenı kesheninde qarsy alyp, «Ulystyń uly kúni: tarıh taǵylymy men jańa kózqarastar» dóńgelek ústelin ótkizý men «Birlik otyn» jaǵý josparlanyp otyr», - dedi Ásem Áshirova.