Mańǵystaýda «Altyn belgi» ıegerleri kóbeıdi

AQTAÝ. QazAqparat – Mańǵystaýda «Altyn belgi» ıegerleri 30 paıyzǵa artty, dep habarlaıdy QazAqparat tilshisi oblystyq bilim basqarmasyna silteme jasap. Oblystaǵy epıdemıologııalyq ahýalǵa baılanysty bıylǵy oqý jylynyń basym bóligi qashyqtan oqytyldy.

Degenmen aqparattyq tehnologııalardy qoldana otyryp qashyqtyqtan oqytý, oqýshylar men ustazdardyń bilimi men biligin jańasha damytýǵa, ádeti men daǵdysyna tıimdi qaraýǵa múmkindik berdi.

Qashyqtan oqytýǵa qaramastan bıyl oqýshylardyń jetistikteri de az emes.

Túlekterdiń 227-sy «Altyn belgige», 359-y «Úzdik attestatqa» úmitker. Sońǵy úsh jylmen salystyrǵanda «Altyn belgi» ıegerleri shamamen 30%-ǵa, úzdik attestatpen bitirgender 40%-ǵa artty.

Jalpy bilim beretin pánder boıynsha respýblıkalyq olımpıadada Mańǵystaý oblysynyń daryndy oqýshylary 29 medalǵa ıe boldy.

Olımpıada nátıjesi boıynsha Mańǵystaý oblysy komandalyq ІІІ oryndy, Aqtaý qalasynyń «Bilim-ınnovatsııa» lıtseıi ІІ oryndy, Munaıly aýdany №3 jalpy bilim beretin mektebi «Úzdik olımpıadalyq aýyl mektebi» bolyp tanyldy.

Elimizde árbir pedagog erekshe mártebege ıe. Memleket tarapynan árbir pedagogtyń úzdiksiz damýyna barlyq jaǵdaı jasalyp keledi. Osyǵan baılanysty bıyl alǵash ret «Mańǵystaý oblysynyń bilim berý salasyna qosqan úlesi úshin» tósbelgisi taǵaıyndaldy.

Pedagogtardyń sheberligi boıynsha Aqtaý qalasy №14 mektebiniń hımııa páni muǵalimi Túlembetova Aısulý Baǵytqyzy elimizde alǵash ret taǵaıyndalǵan «Qazaqstannyń eńbek sińirgen ustazy» qurmetti ataǵyn, oblystyń bes muǵalimi respýblıkalyq «Úzdik pedagog» ataǵyn ıelendi.