Mańǵystaýda alıment tólemegen er adam qamaýǵa alyndy
ASTANA. QazAqparat - Mańǵystaý oblysynyń Munaıly aýdandyq soty alıment boıynsha bereshegi bar er adamdy eki táýlikke qamaý týraly sheshim shyǵardy, dep habarlaıdy «QazAqparat» HAA tilshisi.
Usynylǵan aqparatqa sáıkes, Munaıly aýdandyq sotymen M. esimdi azamatqa qatysty QR Ákimshilik quqyq buzýshylyq týraly kodekstiń 669-baby boıynsha qozǵalǵan is qaralǵan.
Sottyń 2011 jyldyń 13 shildesindegi sot buıryǵyna sáıkes, M. aı saıyn A-nyń esebine ortaq balalary úshin (18 jasqa tolǵanǵa deıin) óz aılyǵynyń úshten birin aýdaryp otyrýǵa mindettelgen. 2016 jyldyń tamyz aıynan bastap, M. sot buıryǵyn oryndamaı, búgingi kúnge deıingi qaryzy 310 824 teńgege jetken.
Munaıly aýdandyq sotynyń qaýlysyna sáıkes, M. joǵaryda atalǵan 669-baby boıynsha kináli dep tanylyp, eki táýlikke qamaýǵa alyndy.
