Mańǵystaýda alǵys aıtý kúninde birneshe shara ótti
Alǵys aıtý merekesin Mańǵystaýlyqtar jappaı júgirý marafonynan bastady. Tańerteń 400-ge jýyq qala turǵyny men memlekettik qyzmetkerler, túrli etnomádenı birlestik ókilderi teńiz jaǵalaýyna jınalyp, 5 shaqyrym júgirip ótti. Turǵyndardyń arasynda mektep oqýshylarynan bastap, zeınetkerlerge deıin bar. Sharadan soń barlyǵy bir-birine alǵystaryn bildirdi.
Alǵys aıtý kúniniń máni men túp-tórkinin umytpaǵan oblystaǵy ázerbaıjan etnomádenı birlestiginiń ókilderi 50-ge jýyq múgedekterdi jınap, dastarhan jaıdy.
«Barlyq ulttyń bir-birine jáne osy adamdardy qabyldaǵan, aıaýshylyq bildirgen qazaqtarǵa alǵys aıtý kúni dep belgilense ádiletti bolar edi», - dep Elbasymyz aıtqandaı, dıaspora ókilderi qoǵamnan jylylyq kútetin kóńili pás, júregi jyly jandardy merekemen quttyqtap, syılap, osy isi arqyly barsha qazaq halqyna alǵysyn bildirgisi kelgen.
«Qazaqstanda 130-dan astam ult pen ulys ókilderi beıbit ómir súrýde. Dostyq úshin alǵys aıtamyn! Biz kómekke zárý jandar men múgedekterge óz janashyrlyǵymyzdy osylaı bildirgimiz keldi. Olar qıyndyqqa moıymaı, shydap, otbasynyń berekesi bolyp júr. Barlyq qazaqstandyqtardy, aqtaýlyqtardy merekemen quttyqtaımyn! Elimiz aman, jurtymyz tynysh, aspanymyz ashyq bolsyn»,- deıdi «Dostlýg» ázerbaıjan etnomádenı birlestiginiń ókili Rafıga Nasıbova.
Mereke aıasynda «Jomart júrek» aktsııasy bastaldy. Oblys ákimi Eraly Toǵjanovtyń usynysymen bastalǵan sharanyń maqsaty - halyqtyń áleýmettik osal toptary: az qamtylǵan otbasylarǵa, múgedek balalary bar januıalarǵa, múmkindigi shekteýli jandarǵa kómek kórsetý. Shara aıasynda 1 aı boıy «Jomart-Júrek» ekspozıtsııasymen arnaıy avtokólik oblystyń eki qalasy men barlyq aýdanyn aralaıdy. Kómekke muqtaj jandar ózderiniń suranysyn jazyp, jáshikke sala alady.
Aktsııa barysynda qarttar úıindegi qarııalar men jetimder úıindegi balǵyndarǵa syılyqtar taratyldy.
«Men barshańyzdy Alǵys aıtý merekesimen quttyqtap, aldymen densaýlyq tilegim keledi. Sondaı-aq, Prezıdentimiz Nursultan Ábishuly Nazarbaevqa elimizdegi beıbitshilik, tynyshtyq, birlik pen bereke úshin shyn júrekten alǵys aıtamyn! Qarttaryn umytpaı, únemi qamqorlyq tanytatyn oblys basshylyǵyna, mádenı jáne ulttyq ortalyq ókilderine rızashylyǵymdy bildiremin!», - dedi Nadejda Aýstrına.
«Jomart júrek» qaıyrymdylyq aktsııasy aıasynda «Myń alǵys» merekelik kontserti ótti. Keshten jınalǵan qarajat qamqorlyqqa muqtaj 3 otbasyǵa tabystaldy. Túrli ult ókilderi óz halqynyń ánderin aıtyp, myń burala bı bıledi.
«Bul dúnıede umytylmaıtyn dúnıeler bolady, ol bireýden alǵan alǵysyń. Osydan basqanyń barlyǵy oıdan óshiriledi. Biz qazaq eli tek alǵys alǵan elmiz. Osy alǵystyń arqasynda jaqsylyǵymyzǵa jetip jatqan elmiz. Qaıyrymdylyq kontsertine kelgenderińiz úshin aımaq basshysynyń atynan alǵys aıtamyn»,-deıdi Mańǵystaý oblysy əkiminiń orynbasary Maqsat Sqaqov.
Sharada jomart jandar otbasy úlgisindegi balalar aýyly men mamandandyrylǵan balalar úıine turmysqa qajetti tehnıkalardy syılady. Mundaı syılyq oblystyq týberkýlezge qarsy dıspanserge de tabystaldy. Qıyn-qystaý zamanda ózge ulttardyń ózeginen teppeı, baýyryna basqan qazaq halqyna alǵysyn bildirgender Mańǵystaý aspanyn shattyq merekege bóledi.
