Mańǵystaýda alǵashqy kún elektr stantsııasy iske qosyldy
ASTANA. QazAqparat - 1 Mamyr - Qazaqstan halqynyń birligi kúni merekesinde Mańǵystaý oblysynyń tarıhynda tuńǵysh ret Kún sáýlesinen elektr qýatyn alatyn stantsııa ashyldy jáne Teńiz sýyn tuşytatyn zaýyttyń alǵashqy tasy qalandy. Bul týraly QazAqparat Mańǵystaý oblysy ákimdiginiń baspasóz qyzmetine silteme jasap habarlaıdy.
Oblys ákimi Eraly Toǵjanov Qazaqstanda teńdesi joq joba - kún sáýlesinen elektr qýatyn alatyn stantsııanyń ashylýyna qatysty. Munaıly aýdany Batyr aýylynda qýaty 2 Mvt kún sáýlesinen elektr qýatyn alatyn stantsııanyń jalpy aýdany - 36,05 ga, joba quny - 1,2 mlrd teńge. Nysan «Bıznestiń jol kartasy-2020» bıznesti qoldaý jáne damytý baǵdarlamasy arqyly qarjylandyryldy. Elektr stantsııasyn paıdalaný úshin 8580 kún paneli ornatylǵan. Panelder Qazaqstanda otandyq kremnııden óndiriledi. Bul - otandyq óndiristegi kún batareıalarynda jumys isteıtin tuńǵysh elektrli stantsııa. Jańa qondyrǵy 300-ge jýyq úıdi taza elektrmen qamtamasyz etedi.
«2017 jyl - Qazaqstan halqy úshin tabysty jyl boldy. Elbasy N.Á.Nazarbaevtyń bastamasymen Astana qalasynda kúlli álem nazaryn aýdarǵan «Bolashaq energııasy» uranymen «EHRO-2017» halyqaralyq mamandandyrylǵan kórmesi keń aýqymda atalyp ótti. «Bolashaq energııasy» jobasynyń túpki maqsaty - turaqty qýat kózderin basqarýdy qamtamasyz etetin sheshimder men ádisterge qoǵamdastyq nazaryn aýdarý bolyp tabyldy», - dedi oblys ákimi Eraly Toǵjanov.
Sondaı-aq, Quryq aýylynda Teńiz sýyn tuşytatyn zaýyt qurylysynyń alǵashqy tasy qalandy. Joba quny - 39 mlrd. teńge. Qýaty táýligine 50 000 tekshe metr bolatyn zaýyt jeke ınvestorlardyń qarajatymen salynady. Qurylys kezinde 300 adam, paıdalanýǵa berilgen soń 150 adam jumyspen qamtylady. Jobanyń aıaqtalý merzimi 2020 jylǵa belgilenip otyr.
«Búgingi mereke kúni aıasynda óńirimizde birneshe iri jobalar bastalmaq. Quryq aýylynda teńiz sýyn tuşytý zaýytynyń jobalyq-izdestirý jáne qurylys jumysyn bastaýdyń oraıly sáti keldi dep esepteımin. Buǵan qosa Aqtaý, Jańaózen, Jetibaı, Munaıshy, Quryq, Shetpe eldi mekenderin aýyz sýmen qamtamasyz etý jáne aýylsharýashylyq salasyn damytý máselesin tolyqtaı sheshýge múmkindik beredi», - dedi aımaq basshysy Eraly Toǵjanov.
