Mańǵystaýda alǵash ret koronavırýs juqtyrǵan adam emdelip shyqty

AQTAÝ. QazAqparat - Osydan 17 kún buryn Aqtaý halyqaralyq áýejaıynda Túrkııadan tranzıtpen ushyp kelgen 46 jastaǵy azamat koronavırýs juqtyryp, jergilikti ınfektsııalyq aýrýhanaǵa jatqyzylǵan bolatyn. Qazir ol tıisti emdik sharalaryn alyp, tolyq aıyǵyp shyqty,-dep habarlaıdy QazAqparat.

Oblystyq qoǵamdyq kommýnıkatsııalar ortalyǵynyń habarlaýynsha, dárigerler turǵyndy úıine qaıtardy. Oblys ákimdiginiń uıymdastyrýymen arnaıy taksı emdelip shyqqan azamatty Oral qalasyndaǵy úıine deıin jetkizedi. Sonymen qatar, onymen birge ushyp kelgen 22 jolaýshy da úılerine jiberildi.

Qaırat Hasanov jeke sharýamen Túrkııaǵa barǵan Oral óńiriniń týmasy kimnen jáne qandaı jaǵdaıǵa «Covid-19» vırýsyn juqtyrǵanynan beıhabar. Aqtaý áýejaıynan túse salysymen teplovızor onyń boıynda qyzý baryn kórsetken. Óńir dárigerleri ony birden aýrýhanaǵa jetkizip, synama alǵan. Nátıjesinde, saraptama oń kórsetkish kórsetip, naýqastyń koronavırýs juqtyrǵany belgili boldy.

«Rasyn aıtý kerek, basynda qatty aýyrdym. Dirildep, qyzýym kóterildi. Al, qazir esh jerim aýyrmaıdy, ózimdi jaqsy sezinemin. Ári qaraı ózimdi kútemin. Іndetti jeńý úshin qoldan kelgenshe kúresý kerek, úmit úzbegen durys. Dárigerlerge, medbıkelerge, sanıtarlyq qyzmetkerlerge alǵysym sheksiz. Rahmetimdi aıtamyn. Medıtsına qyzmetkerleriniń jyly sózi men qarym-qatynasy meni jigerlendirip, jazylyp shyǵýyma septigin tıgizdi dep aıta alamyn», - dedi emdelip shyqqan alǵashqy naýqas.

Mańǵystaý oblystyq ınfektsııalyq aýrýhanasynyń meńgerýshisi, shtattan tys bas ınfektsıonıst Gúlbaný Nurjanovanyń aıtýynsha, naýqasty emdeý kezinde dárigerler vırýsqa qarsy terapııa joldaryn qoldanǵan. QR Densaýlyq saqtaý mınıstrligimen bekitilgen klınıkalyq hattama negizge alynǵan. Qytaıdan elimizge kelgen tájirıbeli mamandardyń beınekonferentsııa arqyly bergen keńesteri de eskerilgen.

Aıta keteıik, dárigerler Q.Hasanovtan jalpy úsh ret synama aldy. Sońǵy ekeýi teris nátıje kórsetip, boıynda «Covid-19» vırýsy anyqtalǵan joq. Sońǵy bir aptada qyzýy kóterilmegen. Ózin jaqsy sezinedi. Endi, Qaırat Hasanov Oral qalasyndaǵy úıinde 14 kúndik karantınde bolady.

Dál qazir Aqtaýdaǵy oblystyq ınfektsııalyq aýrýhanada koronavırýs juqtyrǵan 4 naýqas em alýda. Bir patsıenttiń jaǵdaıy aýyr, jasandy tynys alý apparatyna qosylǵan. Qalǵan úsh áıeldiń jaǵdaıy qanaǵattandyrarlyq.

Jalpy, qazirgi ýaqytta Mańǵystaýda koronavırýs indetin juqtyrǵan adamdar sany – 9

Aqtaý qalasynda – 4

Jańaózende – 2

Mańǵystaý aýdanynda - 3

Jazylyp shyqqan – 1