Mańǵystaýda áleýmettik mańyzy bar birneshe nysan jóndeledi
Qaıta jańartylatyn ǵımarattardyń sanatynda Beıneý aýdanyndaǵy ortalyq stadıon, Jetibaı aýylyndaǵy kitaphana men dárigerlerlik ambýlatorııa bar.
Oblys bıýdjetiniń negizgi bóligi áleýmettik salaǵa baǵyttalǵan. Máselen, Aqtaý qalasyndaǵy «Jas batyr» sport mektebiniń jóndeý jumystaryna 20 mln teńge qarastyrylsa, Basqudyq aýylynyń aýylishilik jol qurylysynyń qujattamasyn daıyndaýǵa 20 mln teńge bólingen. Qazynadan bólinetin qarajat aýylishilik sý qubyryn tartýǵa da jumsalady. Aıtalyq, Taýshyq aýylyndaǵy 465 jer ýchaskesiniń sý qubyryn júrgizýge 74 mln teńge, Saıyn Shapaǵatov aýylynyń 6-shy kvartalyna sý jáne elektr jelileriniń qujattaryn daıyndaýǵa 11 mln teńge qarajat kózdelgen. Sondaı-aq, aýyldarǵa ınternet jelisin tartý da nazardan tys qalmaǵan.
«Mańǵystaý aýdany boıynsha ınternet baılanysynyń qoljetimdiligin qamtamasyz etý maqsatynda qashyqtyǵy 130 shaqyrymdy quraıtyn «Shetpe-Qyzan-Aqshymyraý» jáne qashyqtyǵy 95 shaqyrymdy quraıtyn «Shetpe-Tushyqudyq-Shebir» baǵytynda talshyqty optıkalyq baılanys jelisin tartýǵa jobalyq-smetalyq qujattardy daıyndaýǵa qarjyny tolyqtaı qoıýdy usynamyz»,-dedi Mańǵystaý oblystyq ekonomıka jáne bıýdjetti josparlaý basqarmasy basshysynyń mindetin atqarýshy Svetlana Nareshova.
Bıýdjetke engizilgen ózgeristerdi depýtattar da biraýyzdan qoldady.
Osylaısha áleýmettik salaǵa baǵyttalǵan qarjy naqtylandy. Oblys ákimi Eraly Toǵjanov endi osy qarajatty tókpeı-shashpaı dittegen jerine jetkizý kerektigin tapsyrdy.
