Mańǵystaýda áleýmettik azyq-túlik baǵasyn turaqtandyrý úshin 500 mln teńge bólindi

AQTAÝ. QazAqparat – Mańǵystaý oblysynda áleýmettik azyq-túlik baǵasyn turaqtandyrý úshin bıyl 500 mln teńge bólindi. Bul týraly oblystyq kásipkerlik jáne saýda basqarmasy basshysynyń orynbasary Pikir Sansyzbaev málim etti, dep habarlaıdy QazAqparat tilshisi.

Bólingen qarjy boıynsha áleýmettik mańyzy bar taýarlardyń baǵasyn turaqtandyrýdyń eki joly bar. Birinshisi – «Aınalym mehanızmi». Bul tetik arqyly kásipker tómen paıyzben nesıe alyp, belgilengen baǵada taýardy sata alady. Al, ekinshi joly – óńirlik turaqtandyrý qoryn azyq-túlik taýarlarymen tolyqtyrý.

«Qazirgi tańda «Aınalym mehanızmi» baǵdarlamasy boıynsha belgilengen baǵamen satýǵa 10 kásipkerlik sýbektisine 8 túrli azyq-túliktiń 3816,2 tonnasyn óndirýge nemese jetkizýge 683,5 mln teńgege tómen paıyzben qaryz berilgen. Aldaǵy ýaqytta osy joba aıasynda kelisimsharttardy ulǵaıtý kózdelip otyr. Sonymen qatar, áleýmettik mańyzy bar taýarlar baǵasynyń saýda ústemesin 15%-dan 10%-ǵa túsirý týraly 48 saýda obektisi bar 5 iri saýda jelisimen jáne 235 saýda obektisimen ekijaqty kelisimge qol qoıylǵan. Baǵa ósimin tejeý maqsatynda bıyl aýyl sharýashylyǵy taýaryn óndirýshileri men kóterme jetkizýshilerdiń 56 jármeńkesi uıymdastyryldy», - deıdi Pikir Sansyzbaev.

Aıta ketsek, 2019-2022 jyldar aralyǵynda azyq-túlik qaýipsizdigin qamtamasyz etý maqsatynda jergilikti bıýdjetten 4,9 mlrd teńge qarajat bólingen.