Mańǵystaýda aldaǵy úsh jylda 19 mektep salynady

AQTAÝ. QazAqparat – Mańǵystaý oblysynda 6 mektepte balalar áli kúnge deıin úsh aýysymmen oqıdy. Mundaı ahýal Munaıly, Qaraqııa, Túpqaraǵan aýdandary men Aqtaý qalasyndaǵy bilim mekemelerinde qalyptasyp otyr, dep habarlaıdy QazAqparat tilshisi.

Búginde aımaqta 2500-den asa bastaýysh synyp oqýshysy úsh aýysymmen oqıdy. Munaıly aýdanynyń Atameken, Batyr, Basqudyq aýyldarynda, Túpqaraǵan aýdanynyń Aqshuqyr aýylynda jáne Qaraqııa aýdanynyń Jetibaı aýylynda osyndaı jaǵdaı tirkelgen.

Bılik ókilderi muny halyq sanynyń artýymen baılanysty ekenin aıtady. Sondyqtan jańa nysandardyń qurylysy qarqyndy.

«Aǵymdaǵy jyly jalpy syıymdylyǵy 3100 oryn bolatyn 5 nysannyń qurylysy júrýde. Onyń ishinde Atameken jáne Basqudyq aýyldaryndaǵy qoldanystaǵy mektepterge árqaısysy 320 oryndyq qosymsha ǵımarattar jyl sońyna deıin paıdalanýǵa beriledi. Qalǵan 3 jańa mektep (Aqtaý - 900 oryndyq, Batyr - 960 oryndyq, Aqshuqyr - 600 oryndyq) kelesi oqý jylynda tapsyrylady», - dedi oblys ákimi Serikbaı Trumov.

Qazirgi tańda iske asyrylyp jatqan jobalarmen qatar aldaǵy úsh jylda 19 mektep (Aqtaý –8, onyń ishinde 2 mektep MJÁ arqyly, Jańaózen – 1, Beıneý – 3, Munaıly – 5, Túpqaraǵan – 1, Qaraqııa – 1) salý josparlanǵan.