Mańǵystaýda akýsher jol boıyndaǵy dámhanada áıeldi bosandyryp aldy
AQTAÝ. QazAqparat - Mańǵystaý oblysy perınataldyq ortalyǵynyń akýsheri Anar Kenjebekova júkti áıeldi jol boıyndaǵy dámhanada bosandyryp, shala týǵan náresteniń ómirin saqtap qaldy, dep habarlaıdy «QazAqparat» HAA tilshisi.
2016 jyldyń kúzinde Anar kezekshilikke túsken kúni Jańaózen qalasynan qońyraý shalyndy. Sanıtarlyq avıatsııa ókilderi perzenthana qyzmetkerine kenshiler qalasynan Aqtaýǵa qaraı avtokólikpen jaqyn arada bosanatyn áıeldiń shyqqandyǵyn habarlady. Bosaný merziminen buryn bolatyn bolǵandyqtan bala ómiri úshin qaýip tóndi. Sanavıatsııanyń brıgadasy jolǵa shyqqansha ýaqyt ótip ketetindikten, Aqtaýdan Anar Kenjebekova bastaǵan akýsherler toby júkti áıeldiń qarsy alýǵa shyqty.
«Anar - 21 jyl eńbek ótili bar tájirıbeli akýsher, ol jaǵdaıdy baǵalaı, únemi tyǵyryqtan shyǵýdyń jolyn taba alady. Dárigerlerdiń taptyrmas kómekshisi. Basqa dárigerler kezekshilikterin tastap kete almaǵandyqtan bul jolǵa Anar attandy», - deıdi Mańǵystaý oblystyq perınataldyq ortalyǵynyń dırektory Jamal Jamanbaeva.
«Júkti áıelmen jol boıy telefon arqyly baılanysta boldyq. Biz oǵan qalaı tynystaý kerek, ózin qalaı ustaýy kerektigi týraly keńes berip otyrdyq. Tolǵaq jıilep ketkendikten biz onyń jaqyn arada bosanatyndyǵyn túsinip, jol boıyndaǵy jaqyn dámhanalardyń birine toqtaýyn suradyq. Keshke qaraı aýa raıy da salqyn, ótkir jel soǵyp turǵan edi. Kishkentaı ǵana salqynnyń saldarynan sábı shetinep ketýi ábden múmkin. Oǵan óte bilikti mamannyń kómegi kerek boldy», - dep Anar bolǵan oqıǵany eske alady.
Top bosandyrýǵa kerekti jabdyqtarmen tolyq alyp shyqqan (dári-dármekter, qolǵaptar, bir ret paıdalanatyn materıaldar, antıseptıkter, jyly jórgekter jáne taǵy basqalary).
«Biz dámhanaǵa kelgende júkti áıeldiń bosanatyn ýaqyty ábden taıap qalǵan. Dereý bosandyrý zalyn jasap jiberip, 3 mınýttan keıin qyz bala dúnıege keldi. Bala da, anasy da aman qaldy», - deıdi akýsher.
Artynsha sanıtarlyq avıatsııa da úlgerip kelip, jas bosanǵan áıel men náreste oblystyq perınataldyq ortalyqqa jetkizildi, birneshe kúnnen keıin ana men bala aman-esen úıine qaıtaryldy.
