Mańǵystaýda «Aqbota» saıabaǵy memleket menshigine qaıtaryldy

AQTAÝ. QazAqparat - Aqtaýdaǵy «Aqbota» saıabaǵy memleket menshigine qaıtaryldy. Saıabaqtyń senimdi basqarýshysy «Rent service 2018» JShS Aqtaý qalasynyń ákimdigine parkti memlekettik menshikke qaıtarý jóninde ótinish bildirdi. Qazirgi ýaqytta jasalǵan kelisimsharttyń kúshin joıý jumysy júrip jatyr, dep habarlaıdy QazAqparat qala ákimdigine silteme jasap.

Qosymsha kelisim jasalǵannan keıin «Aqbota» parki Aqtaý qalasy ákimdigi menshigine qaıtarylady jáne oǵan Aqtaý qalalyq turǵyn úı-kommýnaldyq sharýashylyq bólimi qyzmet kórsetetin bolady.

Saıabaqtyń ınfraqurylymyn damytý úshin «Rent service 2018» JShS 25 mln teńge ınvestıtsııa quıdy.

-Bul qarajat parkte tamshylatyp sýarý júıesin júrgizýge, syıymdylyq pen taımerdi ornatýǵa, búkil jaryq shamdaryn energııa únemdegish shamǵa aýystyrýǵa baǵyttaldy. Kúndelikti tazalaý jumystaryn da biz júrgizdik. Qýraǵan aǵashtardy jınap alyp, «Aqbota» saıabaǵynda jasyl jelekti retke keltirdik, - dedi «Rent service 2018» JShS basshysy Ábdimálik Aleýdın.

Aıta keteıik, jergilikti bıýdjetten parkti damytýǵa qarajat bólinbegen.