Mańǵystaýda aqbóken atqandar memleketke mıllıard teńge zalal keltirgen

AQTAÝ. QazAqparat - Ulttyq qaýipsizdik komıteti Mańǵystaýda aqbókenderdi zańsyz atyp kelgen qylmystyq top ustalǵanyn málimdedi, dep habarlaıdy QazAqparat.

«Ulttyq qaýipsizdik komıteti uıymdasqan qylmys túrlerine qarsy kúres is-sharalaryn júrgizý aıasynda qylmystyq «kásiptiń» jolyn kesýdi jalǵastyrýda.

Osylaısha, 2023 jylǵy qańtar aıynda UQK prokýratýra organdarymen birge arnaıy operatsııa barysynda kıiktiń múıizderin zańsyz óndirý jáne satý arnasyn uıymdastyrýǵa qatysty adamdar tobyn qylmystary ústinde qolǵa túsirdi.

Qundy taýardyń iri partııasyn saýdalaý áreketi kezinde Mańǵystaý óńiriniń qylmystyq álemine qatysy bar buryn sotty bolǵan eki adam ustaldy», - dep jazdy vedomstvo.

Ondaǵy málimetke qaraǵanda, memleketke 1 mlrd teńgeden asa zalal keltirilgenin jáne Qazaqstandaǵy aqbókenderdiń taralýyna edáýir keri áserin tıgizgenderin dáleldeıtin aıǵaqtar jınaqtaldy.

Sotqa deıingi tergeý aıasynda QR QK 339-baby 3-bóligi 2-tarmaǵy boıynsha zańǵa qaıshy árekettiń ózge de qatysýshylaryn anyqtaýǵa baǵyttalǵan jedel tergeý is-sharalar kesheni júrgizilýde.

Foto: gov.kz