Mańǵystaýda agrarlyq sektordy ekonomıkanyń negizgi kúshine aınaldyrý joldary saralandy
AQTAÝ. QazAqparat - Búgin oblystyq ákimdikte aımaq basshysynyń qatysýymen ótken jıynda túrli máseleler qaralyp, mańyzdy usynystar aıtyldy, dep habarlaıdy Mańǵystaý oblysy ákiminiń baspasóz qyzmeti.
Aldymen aýyl sharýashylyǵyn memlekettik qoldaýdy jetildirý jónindegi sharalar men kooperatıvter qurý týraly aqparatpen osy salanyń basqarma basshysynyń mindetin atqarýshy Serik Qaldyǵul baıandama jasady. Ol óńirde agrarlyq sektordy damytyp, ekonomıkanyń negizgi kúshine aınaldyrý - basty maqsat ekenin atap ótti. Sondyqtan memleket jan-jaqty qoldaý kórsetýde. Máselen, QR Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy negizinde jergilikti bıýdjetten asyl tuqymdy mal sharýashylyǵyn damytýǵa, ónimdilik pen sapany arttyrýǵa 80,3 mln teńge, egin sharýashylyǵyn damytýǵa 181 mln teńge bólingen. Qarajatty ınvestıtsııalyq sýbsıdııalaý boıynsha oblystaǵy fermerlerdiń basym kópshiligi jaıylymdardy sýlandyrý ınfraqurylymdaryn qurý jáne mal ósirýshi sharýashylyqtardy sýmen qamtamasyz etý boıynsha ótinishter bergen. Sebebi, Mańǵystaýda birde-bir jer ústi sý kózi joq. Sharýalar qudyq qazyp, malyn sýǵarady. Sondyqtan suranys osyǵan basym. Máselen, 2017 jyly 42 uńǵyma qazylǵan. Onyń 20-sy memleket tarapynan kórsetilgen qoldaýmen paıdaǵa jarapty.
Oblysta, osy jyly 14 aýyl sharýashylyǵy kooperatıvi qurylǵan.Atap aıtsaq, Jańaózende - 1, Beıneý aýdany - 4, Qaraqııa aýdany - 2, Mańǵystaý aýdany - 4, Munaıly aýdany - 2, Túpqaraǵan aýdany - 1. Nátıjesinde aýyl sharýashylyǵy kooperatıvteri 2017 jyldyń 10 aıynda 44,7 tonna et, 56 tonna sút, 201 tonna kókónis óndirgen. Bul jaqsy ósim,- dedi Serik Qaldyǵul.
Kún tártibinde talqyǵa túsken taǵy bir másele - densaýlyq saqtaý salasyn tsıfrlandyrý baǵdarlamasy. Joba halyqtyń ómir súrý jasyn uzartý men densaýlyq saqtaý salasyn ilgeriletýdi kózdeıdi. Sondyqtan baǵdarlamanyń maqsatymen osy salanyń basqarma basshysynyń mindetin atqarýshy Klara Oralbaeva tanystyrdy. Aıtýynsha, baǵdarlamanyń basty maqsaty - halyqqa sapaly medıtsınalyq qyzmet kórsetý. Joba aıasynda barlyq densaýlyq saqtaý uıymdarynda biryńǵaı aqparattyq júıe engizilip, dárigerler men orta deńgeıdegi mamandar kompıýterlik tehnıkamen tolyqtaı qamtamasyz etilmek. Sondaı-aq, barlyǵyna birdeı ǵalamtorǵa kirý múmkindigi beriledi. Osyǵan oraı, emhanalardaǵy kezekke turý máselesi sheshilip, halyqpen tyǵyz baılanys ornatylady. Tsıfrlandyrý 2018 jyldan bastap qolǵa alynbaq,-dedi Klara Oralbaeva.
«Advokattyq qyzmet jáne zań kómegi týraly» zań jobasyn oblystyq ádilet departamentiniń basshysy Rýslan Balǵazın aıtty. Bul zań jobasy keshendi jáne memleketpen kepildendirilgen zań kómegi týraly normalarmen, sonymen qatar jeke kásip etýshi zańgerler týraly normalarmen baıytylǵan. Joba aıasynda túıtkildi máseleler de saraptalǵan. Ony sheshý úshin kelesi sharalar kózdeledi. Aldymen, zań jobasynda «zań keńesshisi» dep atalatyn jeke kásip etýshi zańgerlerdiń qyzmetin palataǵa biriktirý arqyly reglamentteý. Ekinshiden, shetel tájirıbelerin negizge ala otyryp, qarjy jaǵdaıy qıyn azamattarǵa keshendi áleýmettik probono dep atalatyn zań kómegin kórsetýdi engizý. Advokattardyń biliktiligin joǵarylatý. Eger, sapasyz kómek kórsetken jaǵdaıda olardy jaýapqa tartý. Zań jobasynyń qabyldanýy halyqqa bilikti mamandarmen qoljetimdi jáne sapaly zań kómegin kórsetýdi qamtamasyz etedi.
Apparattyq jıyn sońynda óńir basshysy birqatar basqarma basshylaryna naqty tapsyrma berdi.
