Mańǵystaýda «Ábish álemi» І Halyqaralyq teatr festıvali ótedi
Qazaqstannyń Eńbek Eri, Halyq jazýshysy Ábish Kekilbaevtyń shyǵarmalaryn nasıhattaýǵa arnalǵan alǵashqy teatr festıvali 2016 jyly jeltoqsan aıynda respýblıkalyq deńgeıde ótti. Oǵan el óńirlerinen – 6 jáne Reseıden Noǵaı teatry qatysqan bolatyn. Bıylǵy qazan aıynda QR Mádenıet jáne sport mınıstrliginiń jáne TÚRKSOI-dyń qoldaýymen, Mańǵystaý oblysy ákimdiginiń uıymdastyrýymen ótetin festıvaldiń ereksheligi – oǵan álemniń túkpir-túkpirinen birneshe teatr ujymy qatysady. Atap aıtqanda, Armenııanyń Abelıan Vanadzor memlekettik drama teatry, Grýzııanyń Tbılısıdiń Memlekettik Azerbaıdjan teatry, Irannyń Bıle Savar Barbod teatry, Ózbekstannyń Horezm teatry, Tájikstannyń K.Hýdjandı atyndaǵy mýzykalyq komedııa teatry, Túrkııanyń Memlekettik teatry, Túrikmenistannyń Memlekettik teatry qoıylymdaryn usynady.
Al Qazaqstannan festıvalge M.Áýezov atyndaǵy memlekettik akademııalyq drama teatry, J.Aımaýytov atyndaǵy Pavlodar oblystyq drama teatry jáne N.Jantórın atyndaǵy drama teatry qatysady.
«Ókinishke oraı, Ábekeńniń klassıkalyq kórkem shyǵarmalarynyń sahnalanǵany, onyń ishinde ózge tilderge aýdarylǵany tym az. Sondyqtan olarǵa bıylǵy festıvalge óz repertýaryndaǵy ulttyq jáne klassıkalyq qoıylymdarmen qatysýǵa ruqsat etildi. Al bolashaqta Ábekeń shyǵarmalaryn ulttyq jáne shet elderdiń sahnalarynda sóıletýge jan-jaqty daıyndyq júrgiziledi dep oılaımyn. Bul rette, jalǵyz bizdiń teatr ǵana emes, Ábish aǵanyń ádebı murasyna janashyr qalamger áriptesteri, basqa da yntaly zııaly qaýym belsene at salysýy tıis», - dedi Nurnııaz Muhanov.
Ábish Kekilbaıulynyń 80 jyldyǵyna arnalǵan merekelik sharanyń ashylý saltanaty 11 qazan Amfıteatr sahnasynda bolady. Ony oblystyń barlyq turǵyny kelip tamashalaı alady.