Mańǵystaýda 91 pedofıl esepte tur

AQTAÝ. QazAqparat - Óńirde 91 pedofıl esepte tur. Bul týraly Mańǵystaý oblystyq polıtsııa departamentiniń basshysy Qanat Táımerdenov máslıhat sessııasynda málimdedi. 5 jyl ishinde jasóspirimge qatysty 44 qylmys jasalǵan, dep habarlaıdy QazAqparat tilshisi.

«Búgingi kúnniń ózekti máselesi - pedofılderdiń jas balalarǵa jasaǵan jynystyq zorlyq-zombylyǵy. 5 jyl ishinde oblysta 3 jastan 13 jasqa deıingi jasóspirimge qatysty seksýaldyq sıpattaǵy 44 qylmys jasalǵan. Onyń ishinde 13-i - zorlaý, onyń bireýi adam ólimimen aıaqtalǵan»,-dedi Qanat Táımerdenov.

Barlyq qylmysker ustalyp, ártúrli merzimge bas bostandyǵynan aıyrylǵan. Oblys boıynsha 91 pedofıl esepte tur. 28-i bostandyqta, 5-eýi psıhodıspanser esebinde tur. Endi aldyn alý sharalaryn júrgizý kerek dep usyndy PD basshysy.

«Osy sanattaǵy qylmystardy boldyrmaý úshin mektep ustazdary, psıhologtar, quqyq qorǵaý organdary birlesip jumys jasaýy kerek. Túsindirý sharalaryn júrgizip, aldanyp qalmaý, birge erip ketpeý kerektigin jıi aıtyp, mysaldarmen kórsetý kerek»,-dedi oblystyq polıtsııa departamentiniń basshysy.

Eske sala keteıik, jýyrda ǵana Aqtaýda tal túste er adam 6 jasar qyzdy úıiniń janynan ertip áketip, zorlamaq bolǵan edi.