Mańǵystaýda 8-synyp oqýshysy akvagrım arqyly tabys taýyp júr

AQTAÝ. QazAqparat - Túpqaraǵan aýdanyna qarasty Fort-Shevchenko qalasynyń turǵyny Kamıla Dáýrenqyzy M. Gorkıı atyndaǵy orta mekteptiń 8-synybynda oqıdy. Ol mektep oqýshysy bola tursa da, jany qalaǵan kásibi arqyly tabys taýyp, otbasyna qolǵanat bolyp júr, dep habarlaıdy QazAqparat tilshisi.

Túpqaraǵan aýdany ákimdigi baspasóz qyzmetiniń habarlaýynsha, Kamıla kishkentaı kezinen akvagrımmen aınalysady.

​«Akvagrım - terige salynatyn sýret. Onyń bala densaýlyǵyna eshqandaı zııany joq dep aıtýǵa bolady. Óıtkeni ol kosmetıkalyq boıaýdyń kómegimen salynady. Al onyń quramy qarapaıym: vazelın, glıtserın, tazartylǵan spırt, boıaǵyshtan ǵana turady. Sońǵy jyldary keń tanylǵan bul qyzmet balalar oıyn-saýyq alańdarynda, parkterde, saýda ortalyqtarynda, akvaparkterde suranysqa ıe. Mereke kúnderi men jármeńkelerde jaqsy tabys alyp keledi. Men sýret salǵandy jaqsy kóremin. Sondyqtan maǵan bul kásip túri unaıdy»,-deıdi Kamıla Dáýrenqyzy.

​Kamılanyń anasy Juldyz Ábishova qyzynyń sýretshilik darynyn bastaýysh synypta baıqaǵan.

«Qyzymnyń sýretshilik qabileti atasynan da, ákesinen de daryǵan dep aıtsam, artyq emes shyǵar. Óıtkeni Kamılanyń atasy sýretshilik qabileti bar kisi bolsa, ákesi sáýletshi mamandyǵynda oqyǵan»,-dedi anasy.

Qazirgi tańda pandemııaǵa baılanysty keń aýqymdaǵy merekelik sharalar men basqosýlardyń bolmaı jatqany túsinikti.

Degenmen, adam az jınalǵan týǵan kún sekildi merekelik keshterde akvagrımmen tabys taýyp júr.

Ol epıdemıologııalyq ahýal qalypqa túsken soń kásibiniń dóńgeleıtinine senimdi.