Mańǵystaýda 765 ata-ana balasyna ekpe saldyrýdan bas tartqan
Olardyń deni - 2-5 jas aralyǵyndaǵy búldirshinder. Ásirese, Munaıly aýdany men Aqtaý qalasy turǵyndary jıi qarsy bolady.
Sábıt Amangeldiuly - 4 balanyń ákesi. Balalaryna ekpe salǵyzýǵa úzildi-kesildi qarsy. «Aýrý da, shıpasy da - qudaıdan» dep týǵaly sábılerine vaktsına saldyrmaǵan. Óıtkeni, sapasyna senbeıdi. Sondyqtan medıtsınalyq uıymdarǵa ekpege qarsy ekenin jazbasha túrde de rastap beripti.
«Balalar múgedek bolýda. Ony salatyn dárigerler de tapshy. Halyqtyń bári biledi ǵoı. Ekpesiz de ósip jatyr. Ózimiz de óstik. Ólgen joqpyz. Aıaq-qoly istemeı qalǵandar, júgirip júrip júre almaı qalǵandar bar. Durys tamaqtanyp, balany qadaǵalaý kerek»,-deıdi Sábıt Amangeldiuly.
Óńirde Sábıt sııaqty ekpeden bas tartqan ata-analar jyl saıyn artyp keledi. Mamandardyń aıtýynsha, kópshiligi dinı kózqarasyna baılanysty bas tartady. Áleýmettik jelide jeldeı esken túrli kertartpa aqparat taǵy bar. Keıbiri balanyń eseıgenin kútedi. Desek te, mamandardyń aıtýynsha, bul - úlken qatelik. «Ekpe salýdan qashpańyzdar» deıdi olar.
«Qazirgi kezde ártúrli aýrýlar bar. Qyzylsha juqtyrý jaǵdaıy 2018 jyldan beri tirkelýde. 2019 jyldyń ózinde 1422 qyzylsha aýrýy tirkeldi. Sonyń 60% - ekpe egilmegen balalardyń arasynda tirkelip otyr. Qyzylshaǵa qarsy 2 ekpe salynady - 1 jasynda jáne 6 jasynda. Bárin almasa, tolyq ımmýnıtet qalyptaspaıdy. Ekpeni tolyq alýǵa shaqyramyz»,-deıdi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Gúlshat Shorbasova.
Ekpe elimizde tegin júrgiziledi. 21 aýrýǵa qarsy vaktsına bar. Úkimet bul maqsatqa qyrýar qarjy bóldi. Máselen, 2019 jyly bir ǵana tumaýǵa qarsy ekpege 45 mln 700 myń teńgege jýyq qarajat bólingen.