Mańǵystaýda 750 azamat áskerge shaqyrylady

AQTAÝ.QazAqparat - Mańǵystaý oblysynda kóktemgi áskerge shaqyrtý naýqany 1 naýryzda bastaldy. Bıyl 750 azamat áskerge attanbaq. Bul týraly Mańǵystaý oblysy Qorǵanys isteri jónindegi departamenttiń bastyǵy Nyǵmet Ahmet málim etti, dep habarlaıdy QazAqparat tilshisi.

Áskerge shaqyrylýshy azamattarǵa 2022 jyldan bastap 1414 servıs-qyzmetteri arqyly SMS-habarlamalar jiberilgen. Shaqyrtý 18 ben 27 jas aralyǵyndaǵy jeti júz elýden astam adamǵa jiberilgen.

Alaıda qazirgi tańda áskerge azamat erkinen tys jiberilmeıdi. Biraq sebepsiz merzimdi áskerı qyzmetke shaqyrtýdan jaltarǵany úshin zańnamamen qylmystyq jáne ákimshilik jaýapkershilikke tartylady.

«Áskerge shaqyrylýshy azamatqa sebepsiz kelmegeni úshin 5 aılyq eseptik kórsetkish nemese 17 250 teńge mólsherinde aıyppul salynady. Al medıtsınalyq kýálandyrýdan nemese tekserýden ótýden jaltarǵany úshin ákimshilik eskertý nemese 3 AEK ıaǵnı 10 350 teńge mólsherinde aıyppul tóleıdi», - dedi Nyǵmet Ahmet.

Sondaı-aq, spıkerdiń aıtýynsha áskerı qyzmettiń bedeli jyl saıyn artyp keledi. Bul merzimdi áskerı qyzmetke shaqyrý jáne joǵary áskerı oqý oryndarynda oqýǵa kandıdattardy irikteý kezinde baıqalady. Áskerı qyzmetshiler tegin medıtsınalyq qyzmetterdi paıdalana alady jáne sanatorııalarda emdelip, memleket esebinen turǵyn úımen qamtamasyz etilýge, tómen paıyzdyq mólsherlemelermen ıpotekaǵa qol jetkizýge quqyǵy bar. Bul salanyń qyzmetkerlerine turǵyn úıdi jaldaý úshin aı saıyn ótemaqy tólemderi berilip, erte zeınetke shyǵýǵa múmkindik beriledi.