Mańǵystaýda 695 myń sharshy metr turǵyn úı óz ıesin tapty
Mańǵystaýda alty aıda 695 myń sharshy metr turǵyn úı paıdalanýǵa berilgen. 2018 jylǵy jospar - bas-aıaǵy 916 myń sharshy metr turǵyn úıdi bolashaq ıesine tapsyrý. Qazirgi tańda oblysta bir turǵynnyń baspanamen qamtylý kórsetkishi - 23 sharshy metr. Al respýblıkada bul kórsetkish 21,6 sharshy metrdi quraıdy. Bul týraly Mańǵystaý oblysynyń ákimi Eraly Toǵjanov oblystyq máslıhattyń kezekten tys sessııasynda málimdedi.
«7-20-25» baǵdarlamasy boıynsha Mańǵystaý oblysyna bir qaryz alýshyǵa nesıeniń shekti kólemi 25 mln teńge dep belgilendi. Óńirlik ekonomıka ósimin qamtamasyz etýge baǵyttalǵan memlekettik baǵdarlamalardyń oryndalýy turaqty baqylaýda. «Nurly jol» memlekettik baǵdarlamasy aıasynda oblysta quny 226 mlrd teńge bolatyn 18 joba iske asyrylýda. Sonyń arqasynda 3 myń jumys orny qurylady.
Baǵdarlamanyń negizgi baǵyttarynyń biri - zamanaýı transporttyq ınfraqurylymdy qalyptastyrý. Respýblıkanyń jáne óńirdiń tranzıttik áleýetin damytý baǵytynda oblysta ınvestıtsııalyq quny 215 mlrd teńge bolatyn 9 iri ınvestıtsııalyq joba iske asyrylýda. Nátıjesinde 2 myń jańa jumys orny ashylady.
«Aýylishilik joldardy damytý jumystary ákimdiktiń turaqty baqylaýynda bolady. Aǵymdaǵy jyly jergilikti mańyzy bar joldardy salýǵa jáne jóndeýden ótkizýge bıýdjetten 8 mlrd teńge qarjy bólindi. Beıneý, Qyzan, Prıozernyı aýylishilik, Aqtaý qalaishilik, Kaspıı energetıkalyq HAB joldarynyń qurylysy jyl sońynda aıaqtalady. «Shetpe-Qyzan», Baıandy, Mańǵystaý-4, Qyzyltóbe-2, HGMZ joldarynyń qurylysy jalǵasady. Aýyl joldaryn jaqsartýdy kezeń-kezeńimen sheshý úshin jalpy uzyndyǵy 124 shaqyrym bolatyn Beıneý, Quryq, Shebir, Aqshymyraý, Basqudyq, Atameken aýylishilik, Aqtaý, Jańaózen, Fort-Shevchenko qalaishilik joldary qurylysynyń jobalyq-smetalyq qujattary jasalýda. Sonymen qatar, «Taýshyq-Shetpe» (70 km), «Aqtaý - Fort-Shevchenko - Qalamqas ken orny» (66 km), «Shetpe-Úshtaǵan» (54 km), «Tuşyqudyq aýyly» (29 km), «Tuşyqudyq-Shebir» (13 km) avtomobıl joldarynyń orta jóndeý jumystary júrgizilip jatyr. Búginde qanaǵattanarlyq jaǵdaıdaǵy jergilikti mańyzdaǵy joldar úlesi - 92%», - dedi oblys ákimi Eraly Toǵjanov.
«Nurly jer» memlekettik baǵdarlamasy aıasynda oblysta quny 19 mlrd teńgeni quraıtyn 28 joba júzege asyrylýda. Qazir oblysta paıdalanylmaı otyrǵan 452 jer ýchaskesi (26 myń ga) bar, onyń ishinde 111 jer ýchaskesi (21 myń ga) memleket menshigine qaıtaryldy.
167 jer ýchaskesi shaǵyn jáne orta bıznes sýbektilerine saýda-sattyqqa shyǵaryldy. Onyń ishinde 105 ýchaske (36 myń ga) aýktsıon arqyly, 62 ýchaske (100 myń ga) ýaqytsha paıdalaný quqyǵymen satyldy. Nátıjesinde bıýdjetke 1,7 mlrd teńge tústi.
Qurylysy uzaqqa sozylǵan nysandar boıynsha tıisti sheshimder qabyldandy. Olar: káriz tazalaý stantsııasy; AQQÝ-1 turǵyn úı kesheni; Jańaózen qalasyndaǵy jylý-energetıkalyq stansa. Úleskerler máselesi de tolyqtaı sheshimin tapty.
