Mańǵystaýda 600 dýadaq erkindikke jiberildi
AQTAÝ. QazAqparat - Mańǵystaý aýdanynyń Saı-Ótes aýylynda 600 jıek dýadaq Kendirli-Qaıasan qoryǵyna ushyryldy. Qustardyń kóbi Birikken Arab Ámirliginde ósirilgen bolsa, keıbireýleri Túrkistandaǵy tuqymbaqtan ákelingen, dep habarlaıdy Qazaqparat tilshisi.
Shara maqsaty - joıylyp bara jatqan, sırek kezdesetin, Qyzyl kitapqa engizilgen dýadaqtyń popýlıatsııasyn saqtaý jáne qalpyna keltirý.
Joba uıymdastyrýshylarynyń aıtýynsha, qazaq dalasyna 2009 jyldan beri jyl saıyn Ábý-Dabı qalasynda ósirilgen qustar jiberiledi. Oblys aýmaǵynda ushyrylǵan qustardyń barlyǵyna arnaıy belgi taǵylyp, GPS qondyrǵylar ornatylǵan. Osy qurylǵylardyń arqasynda qoryqshylary men ǵalymdar qustyń ushyp ketetin baǵytyn jáne olardyń qaı jerde kóbeıetinin zertteıtin bolady. Adam qolynda ósken dala qusy Mańǵystaý tabıǵatyna da tez sińisip, qysqa deıin jyly jaqqa ushyp ketedi.
«Bizder aldymen, Mańǵystaý óńiriniń tabıǵatymen tanysyp, óńirdiń ekologııalyq jaǵynda eskerdik. Budan bólek aýa-raıyn da baqylyp kórdik. Sodan soń Mańǵystaý dalasy dýadaq qustaryna naǵyz qolaıly meken ekenin bilip, 20-30 núktege qazyq qaǵyp, belgiledik. Qazir biz sol alǵashqy núktelerdiń birindemiz. Bul jerler dýadaq qusyna taptyrmas óńir eken. Bizder qustardy jiberip qana qoımaı, olardy 10-15 kúndeı baqylap, qarap júretin bolamyz. Olardyń osy jerlerge jersinip ketýine múmkinshilik jasaımyz», - deıdi qus mamany Erık Le Nýz.
Jalpy mamandardyń boljamy boıynsha, óńirde shamamen 1-1,5 myń dýadaq meken etýge múmkindik bar.
«Osy jerde sáýir, mamyr aılarynda jumyrtqalaıdy. Balapandaryn órgizedi. Sosyn kúzge deıin Mańǵystaý aýmaǵynda bolady. Qazan, qarasha aılarynda alǵashqy sýyq túsken kezde, eki-úsh kúnde bir jınalyp, jyly jaqqa ushyp ketedi. Kún jylyǵan ýaqyttak kóktemde Mańǵystaýǵa ushyp keledi», - deıdi Mańǵystaý oblystyq Orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Ǵabbas Dosatov.
Sharanyń qarjylandyrýdy Birikken Arab Ámirlikteri jáne QR Aýyl sharýashylyǵy mınıstrliginiń Orman sharýashylyǵy jáne janýarlar álemi komıtetimen birlese júzege asyrady.
