Mańǵystaýda 500-ge jýyq otbasy baspanaly boldy
AQTAÝ. QazAqparat - «Nurly jer» memlekettik baǵdarlamasy aıasynda 478 otbasyna jańa páter kiltteri tabystaldy, dep habarlaıdy QazAqparat oblys ákiminiń baspasóz qyzmetine silteme jasap.
Sharaǵa Mańǵystaý oblysynyń ákimi Eraly Toǵjanov, «Qazaqstan Ipotekalyq Kompanııasy» IU» AQ Basqarma Tóraǵasynyń orynbasary Rýslan Kákim qatysty.
Qazaqstan Ipotekalyq Kompanııasy Aqtaý qalasynyń 55 jyldyq merekesi qarsańynda kezekte turǵan 478 otbasyna 161 bir bólmeli, 237 eki bólmeli jáne 80 úsh bólmeli páterdiń kiltterin tabystady. Jańadan salynǵan kópqabatty turǵyn úıdiń jalpy aýdany - 26 122,4 sharshy metr. Páterler taza árleýden ótken. Barlyǵynda qajetti kommýnıkatsııalar men gaz plıtasy jáne santehnıka ornatylǵan. Jańa turǵyn úı Elbasy Nursultan Nazarbaevtyń «Nurly jer» baǵdarlamasynyń «Satyp alýmen jalǵa berý» baǵyty aıasynda júzege asyp otyr.
«Nurly jer» baǵdarlamasy boıynsha elimizde 1,5 mıllıonǵa jýyq qoljetimdi turǵyn úı salý josparlanǵan. Sonymen birge, salynatyn ǵımarattardyń sapasyna, ekologııalyq tazalyǵyna jáne energııalyq tıimdiligine joǵary talap qoıylýda. Osyǵan oraı úkimetke, jergilikti atqarýshy bılik organdaryna halyqty turǵyn úımen qamtamasyz etý isin jedel ári tıimdi júrgizý boıynsha úlken salmaq salynyp, jaýapkershilik júkteldi. Búkil elimizdegi sııaqty, qazir bul baǵyttaǵy naqty jumystar Aqtaý qalasynda da iske asyrylyp jatyr. Aqtaý qalasyndaǵy jańa shaǵyn aýdandardy ıgerý, barlyq ınfraqurylymymen jańadan úı turǵyzý - munyń barlyǵy da túptep kelgende áleýmettiń áleýetin arttyrýǵa baǵyttalǵan josparly jumystardyń nátıjesi»,-dedi Eraly Toǵjanov.
Aqtaý qalasynda «Satyp alýmen jalǵa berý» baǵyty boıynsha búginge deıin jalpy aýdany 56 664,9 sharshy metrdi quraıtyn 986 páter paıdalanýǵa berilgen.
«Qazaqstan Ipotekalyq Kompanııasy birinshi kezekte, halyqtyń eń osal toptary - kópbalaly jáne tolyq emes otbasylardyń, múmkindigi shekteýli adamdardyń, jetimderdiń baspanaly bolýyna kóńil bóledi. Bul - Elbasymyzdyń bastamasymen júzege asyrylǵan bizdiń ortaq isimiz. Bizge jaýapty mıssııa júkteldi jáne biz joǵary nátıjege qol jetkize alatynymyzdy dáleldedik», -dep atap ótti Rýslan Kákim.
