Mańǵystaýda 5 memqyzmetshi teris qylyǵy úshin jumystan qýylǵan
Sondyqtan, memlekettik kirister departamentindegi mamandardyń fýnktsıonaldyq mindetterin qaıta qaraý kerek. Aımaq basshysy Eraly Toǵjanov osylaı dedi.
Máselen, departament shtatynda 643 memlekettik qyzmetker bar. Onyń ishinde 145-i quqyq buzýshylyq jasaǵany úshin tártiptik jazaǵa tartylǵan. Taǵy 3-ýine qatysty sybaılas jemqorlyq deregimen is qozǵalǵan.
«Halyqtan kelip jatqan aryzdar jaıdan-jáı emes. Mindetterdiń naqty anyqtalmaýy - úlken másele. Sondyqtan osy departament qyzmetkerleriniń nemen aınalysatynyn, fýnktsıonaldyq qyzmetterin erinbeı qarap shyqtym. Jalpy, munda shtatta jáne shtattan tys 700-den astam adam jumys isteıdi eken»,-dep atap ótti Eraly Toǵjanov.
Aımaq basshysynyń aıtýynsha, ár basqarmadaǵy basshy men bas maman jáne jetekshi maman - bári birdeı mindetti atqarady.
«Máselen, táýekelderdi taldaý basqarmasy basshysynyń qyzmetin alyp qaraıyq. Fýnktsıonaldyq mindetteriniń osy basqarmadaǵy táýekelder bóliminiń basshysynan esh aıyrmashylyǵy joq. Birdeı. Kim jaýap beredi? Bas mamandyki de birdeı. 3 adam birdeı ispen, birdeı máselemen aınalysa ma?»,-dep tańdanysyn bildirdi oblys ákimi.
Tipti ártúrli basqarma bas mamandarynyń qyzmetteri de birdeı bolyp shyqty.
«Memlekettik kiristerdi taldaý bóliminiń bas mamany men salyq ákimshiligin taldaý bólimi basshysynyń mindetteri birdeı. Ártúrli bólim. Biraq bir fýnktsıonaldy qyzmet jazylǵan. Bireýin ǵana oqyp bereıin, «selektorly jedel keńes otyrystardyń materıalyn ázirleý» dep jazylǵan. Budan basqa da mańyzdy mindetter kóp qoı»,-dedi ákim.
Oblys boıynsha salyq túsimi tolyq oryndalmaı otyr. Sondyqtan, aımaq basshysy buǵan qyzmetkerlerdiń naqty mindeti joqtyǵy, olardyń jumysyna salǵyrttyǵy bir sebep deı kele, mamandardyń fýnktsıonaldyq mindetterin qaıta qaraýdy oblys ákimi apparaty basshysynyń orynbasary Ásel Balmanova men QR MQІSJQІ agenttiginiń MO boıynsha departamentiniń basshysy Nurgúl Jannazarovaǵa tapsyrdy.
Al, óz kezeginde Nurgúl Jannazarova atalǵan departament mamandarynyń kemshilikke jıi jol beretinin atap ótti.
«2018 jyly 5 qyzmetker teris qylyǵy úshin jumysynan bosatyldy. Sońǵy 2 jylda memkirister departamentinde 268 memlekettik qyzmetshi jazaǵa tartylǵan. Onyń ishinde 256-na tártiptik jaza qoldanyldy. Bir aıta keterligi, onyń ishinde 109 adam - basshy laýazymyndaǵy qyzmetkerler»,-deıdi.
Osy departamenttiń mamandary usaq quqyq buzýshylyqtar men ákimshilik quqyq buzýshylyqtar da jasaǵan. 9 maman kóshede júrý erejesin buzyp, kólikti masań basqarǵany úshin jáne áleýmettik jelige beıádep sýretter júktegeni úshin jaýapqa tartylǵan.
