Mańǵystaýda 5 eldiń teatr ujymdary bas qosty
AQTAÝ. QazAqparat - Mańǵystaýda Kaspıı mańy elderiniń II halyqaralyq festıvali bastaldy. 5 elden kelgen 8 teatr ujymy 3 kún boıy 10-ǵa jýyq úzdik týyndylaryn sahnalaıdy, - dep habarlaıdy QazAqparat tilshisi.
Festıval ulttyq teatr jáne kıno óneriniń sańlaǵy Nurmuhan Jantórınniń 90 jyldyǵyna oraı uıymdastyrylyp otyr. Shara oblys ákimdigi men Túrksoıdyń (Halyqaralyq túrki mádenıeti uıymy) bastamasymen, QR Mádenıet jáne sport mınıstrliginiń qoldaýymen ótedi.
«Festıvaldiń maqsaty - qazaqtyń uly akteriniń rýhyna qurmet kórsete otyryp, Kaspıı jaǵalaýy elderi teatrlarynyń mádenı-rýhanı yntymaqtastyǵyn arttyrýǵa yqpal etý. Teatrlardyń shyǵarmashylyq bastamalaryn yntalandyrý arqyly teatr ónerin damytýǵa úles qosý», - deıdi Mańǵystaý oblystyq mádenıet basqarmasynyń basshysy Pánııa Oralbaıqyzy.
Festıvalge Kaspıı jaǵalaýy jáne túrki tildes elderiniń kásibı drama, mýzykalyq drama teatrlary kelgen. Atap aıtsaq, S. Amýtbaev atyndaǵy Menzelın memlekettik tatar drama teatry (Tatarstan), Bıleh Savar Barbod teatry (Iran), Kemıne atyndaǵy Mary memlekettik drama teatry (Túrkmenstan), Ýfa memlekettik tatar «Nur» teatry (Bashqurtstan), Ǵ.Músirepov atyndaǵy Qazaq memlekettik akademııalyq balalar men jasóspirimder teatry ( Almaty qalasy), Aqmola oblystyq orys drama teatry (Kókshetaý qalasy), Ázirbaıjan Memlekettik Ulttyq drama teatry (Ázirbaıjan), N. Jantórın atyndaǵy Mańǵystaý oblystyq mýzykalyq drama teatry (Aqtaý qalasy).
Festıvaldiń shymyldyǵyn Tatarstannan kelgen óner ujymy «Іbilis» týyndysymen ashty. Qoıylymnyń qoıýshy sýretshisi Valerıı ıAshkýlovtyń aıtýynsha, bul tragedııa janryndaǵy qoıylym. Rejısseri ataqty Sergeı Potapov. «Іbilis» pesasyn Ázirbaıjan aqyny jáne dramatýrgi G. Djavıd 1918 jyly óleń tilindegi drama formasynda jazǵan.
«Menzelın memlekettik tatar drama teatry halyqaralyq festıvalge alǵashqy ret qatysyp otyrmyz. Ujymda nebári 25 ártis bar. «Іbilis» pesasy eń úzdik týyndymyz. Tatarstanda ótken baıqaýda bas júlde alǵan. Spektaklde ómirde óziniń ornyn taba almaǵan keıipkerdi Іbilis adal jolynan adastyra bastaıdy. Jalpy ómirdiń máni týraly baıandalady. Qoıylym bashqurt tilinde qoıyldy. Qatysýshylarǵa sáttilik tileımin! Osyndaı sharaǵa qatysýǵa múmkindik alǵanymyzǵa qýanyshtymyz!» - deıdi Reseı Federatsııasynyń eńbek sińirgen ártisi, Menzelın memlekettik tatar drama teatrynyń bas sýretshi Valerıı ıAshkýlov.
Festıvaldyń alǵashqy kúninde qatysýshylar men qonaqtar N. Jantórınniń eskertkishine gúl shoqtryn qoıyp, baspasóz máslıhatyna qatysty. Onda ádilqazylar alqasy men uıymdastyrý alqasy túrli suraqtarǵa jaýap berdi. Mártebeli meımandar arasynda Asanáli Áshimov bastaǵan óner tarlandarynan bastap, Talǵat Temenov, Bekjan Turys, Sábıt Ábdihalyqov syndy ártister bar.
Búgin keshki 8-de teńiz jaǵalaýyndaǵy amfıteatrda festıvaldiń gala-kontserti ótedi. Festıval 13-16 qyrkúıek aralyǵynda jalǵasady.
