Mańǵystaýda 5 eldiń teatr sańlaqtary qyzyl kilemmen júrip ótti
AQTAÝ. QazAqparat - Búgin Kaspıı jaǵalaýy elderiniń II halyqaralyq teatr festıvali saltanatty túrde ashyldy, dep habarlaıdy QazAqparat tilshisi.
Festıvaldiń ashylý saltanatynda qatysýshylar aldymen qyzyl kilemmen júrip ótti. Keıin teńiz jaǵalaýyndaǵy amfıteatr tórinde gala-kontsert boldy. Bes eldiń ónerpazdary ánnen shashý shashyp, Mańǵystaý sahnasyn sán men saltanatqa bóledi.
Sharaǵa Mańǵystaý oblysynyń qurmetti azamattary, QR-nyń eńbek sińirgen qaıratkerleri, teatr sańlaqtary keldi.
«Jańa festıval. Ómiri uzaq bolsyn. Azamattarǵa rahmet. Kaspıı dostyqtyń ózeni emes - ónerdiń ózeni! Mereke qutty bolsyn!», - dedi Qazaqstannyń halyq ártisi Talǵat Temenov.
Bul shara - 5 eldiń óneri men mádenıetin biriktirgen festıval. Ártister men halyqty jaqyndatqan mereke. Oblys ákimi Eraly Toǵjanovtyń aıtýynsha, osy aıtýly shara arqasynda Mańǵystaý mádenıeti taǵy bir satyǵa bıiktedi. Túrli ult pen halyqtyń rýhanı yntymaqtastyǵyn arttyrdy.
«Mańǵystaý jerinde úlken toı bolýda. Bul N.Jantórın atyndaǵy úlken teatrdyń tikeleı uıymdastyrýymen ótip jatqan festıval. Osy shara qazaq dalasynyń birtýar uly Nurmuhan aǵamyzdyń esimine, 90 jyldyǵyna arnalady. Búgin ortamyzda eldiń rýhyn da, halyqtyń namysyn da kóteretin, elimizdiń qurmetti azamattary, is-sharaǵa kezinde muryndyq bolǵan azamattar otyr. Bárine rahmetimdi aıtamyn. Túrik eliniń dástúri men rýhyn kóterip júrgen azamattar da bar», - dedi Eraly Toǵjanov.
Festıvalge qatysýǵa kelgen teatrlar kórermendi án men kúıge bóledi. Óz óner ujymdaryn tanystyrdy.
«Biz Almaty qalasy Ǵ.Músirepov atyndaǵy balalar men jasóspirimder teatrynan kelip otyrmyz. Ujymymyz «Shyńyraý» spektaklin qoıatyn bolady», - deıdi teatr dırektory Sábıt Ábdihalyqov.
Festıvalge Kaspıı jaǵalaýy jáne túrkitildes elderdiń kásibı drama, mýzykalyq-drama teatrlary kelgenin buǵan deıin habarlaǵan bolatynbyz. Olardyń arasynda S. Amýtbaev atyndaǵy Menzelın memlekettik tatar drama teatry (Tatarstan), Bıleh Savar Barbod teatry (Iran), Kemıne atyndaǵy Mary memlekettik drama teatry (Túrkmenstan), Ýfa memlekettik tatar «Nur» teatry (Bashqurtstan), Ǵ.Músirepov atyndaǵy Qazaq memlekettik akademııalyq balalar men jasóspirimder teatry ( Almaty qalasy), Aqmola oblystyq orys drama teatry (Kókshetaý qalasy), Ázerbaıjan Memlekettik Ulttyq drama teatry (Ázerbaıjan), N. Jantórın atyndaǵy Mańǵystaý oblystyq mýzykalyq drama teatry (Aqtaý qalasy).
Teatrlar ujymdary 16 qyrkúıekke deıin úzdik týyndylaryn sahnalaıtyn bolady. Kirý - tegin.
