Mańǵystaýda 46 myń turǵyny bar aýylda alǵash ret mádenıet úıi salynyp jatyr
Jańaózen qalasyna qarasty Rahat eldi mekeni kún sanap kórkeıip keledi. 46 myń adam qonystanǵan aýylda búginde birneshe nysan qurylysy men ǵımarattardy jóndeý jumystary júrip jatyr.
Rahat eldi mekeninde alǵash ret 300 oryndyq mádenıet úıi salynyp jatyr. Sh pishindes nysannyń bir bóligin tutasymen 300 oryndyq kórermen zaly alyp jatyr. Orta bóligi ujym qyzmetkerlerine arnalsa, ekinshi bóliginde bir mezette 45 adamdy qabyldaıtyn kitaphana da ornalasady. Kitap qorynda 12-14 myń ádebı oqýlyq bolady dep josparlanýda. Eki qabatty ǵımarattyń joǵary qabatyndaǵy bólmeler estrada jáne teatr óneri, beıneleý taǵy basqa úıirmelerdi ótkizýge arnalyp, jabdyqtalady. Nysan iske qosylǵanda 32 jańa jumys orny qurylady. Búginde qurylys basynda 60-tan astam jergilikti azamat jumys istep júr. Qurylys jumystarynyń 80 paıyzy aıaqtalǵan. Mamyr aıynyń aıaǵyna deıin tolyq aıaqtap, paıdalanýǵa berý josparlanýda.
Sonymen qatar, jýyq arada Rahat aýylynda bir aýysymda 50 adamdy qabyldaıtyn dárigerlik ambýlatorııa salynbaq. Sondaı-aq eki qabatty sport keshenin turǵyzýǵa ázirlik bastaldy. Áleýmettik nysandar iske qosylǵan soń 40 astam adam turaqty jumyspen qamtylady.