Mańǵystaýda 40 qoǵamdyq kelisim keńesi jumys isteıdi
Aqtaý qalasyndaǵy Dostyq úıinde Mańǵystaý oblysy Qazaqstan halqy Assambleıasynyń XHI sessııasy ótti. «Rýhanı jańǵyrý - Ult jańǵyrýy» dep atalatyn alqaly jıynǵa Assambleıaǵa múshe óńirdegi 20-dan astam etnomádenı birlestiktiń ókilderi túgel qatysty. Kún tártibinde Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵan mindetterdiń Mańǵystaý oblysynda júzege asyrylýy jáne Qazaqstan halqy Assambleıasynyń XXV sessııasynda aıtylǵan tapsyrmalardyń oryndalý barysy talqylandandy.
Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda jańa tarıhı kezeńge tán qaterler men táýekelderge jan-jaqty baǵa bere otyryp, rýhanı jańǵyrý arqyly bolashaqqa degen óziniń tereń kózqarasyn bildirdi. Sebebi eldiń taǵdyry men erteńi - memleket quraýshy ult retinde qazaqtyń qolynda. Al, turaqtylyq pen tatýlyq jarqyn bolashaqtyń kepili. Sondyqtan Memleket basshysy Nursultan Nazarbaev osydan 22 jyl buryn Qazaqstandyqtardy biriktirýdiń biregeı múmkindigin kóre otyryp, Qazaqstan halqy Assambleıasyn qurdy.
«Búginde uıym halyqtyq ókildiktiń erekshe tetigi retinde memlekettiń qoǵamdyq baqylaý júıesinde erekshe rólge ıe. Dál osy mindetti atqaryp júrgen Qazaqstan halqy Assambleıasynyń róli jańǵyrý jolynda aıryqsha. Assambleıa elimizde turatyn barlyq etnostardyń biregeı de tól mádenıetin saqtap, qoǵamdyq kelisimdi nyǵaıtý men halyq birligin jetildirý jolynda kóptegen jumys atqarýda», - dedi jıynda sóz alǵan oblys ákimi Eraly Toǵjanov.
Aımaq basshysy oblystyń áleýmettik-ekonomıkalyq damýyn saraptaı kele Assambleıa tarapynan atqarylǵan sharalarǵa toqtaldy. Koreılerdiń Qazaqstanda qonystanǵanyna 80 jyl tolýyna oraı mereıtoı, Túpqaraǵan aýdanynda Taras Shevchenko murajaıynyń 25-jyldyǵy, Koreı etnomádenı birlestiginiń 25-jyldyǵy keń kólemde atap ótilgen.
«Rýhanı jańǵyrý» baǵdarlamasy aıasynda Otpan taýǵa úsh bıdiń eskertkishi qoıyldy.
Óńir basshysy Assambleıanyń ǵylymı-sarapshy tobyna Mańǵystaýdyń áli de beımálim jerlerin zerttep, tarıhı-mádenı qundylyqtaryn jańǵyrtýǵa
tapsyrmalar berdi. Ol úshin áleýmettik zertteýler, áleýmettik saýalnamalar jáne ǵylymı-metodıkalyq sharalar júrgizý kerektigin aıtty. Birqatar basqarma basshylaryna memlekettik etnosaıasatty tıimdi júzege asyrýdy tapsyrdy. Ásirese, BAQ ókilderi arqyly kópultty, tabysty otbasylardy kórsetip, otbasy qundylyǵyn nasıhattaý úshin keshendi jospar daıyndaý qajettigin atap ótti.
Aımaqta qaıyrymdylyq jasaýshylardyń sany kún sanap artyp keledi. Búginde 224 adam 4 mlrd teńgege kómek kórsetken. Aımaq basshysy mundaı ıgi isterdi jalǵastyrýǵa barlyq turǵyndardy shaqyrady.
Sessııa sońynda oblys ákimi ulttyq mádenı ortalyqtardyń jetekshilerin oblystyq Assambleıanyń belsendi múshelerin marapattady.
Aıta keterligi, óńirde oblystyq, qalalyq jáne aýdandyq deńgeıdegi 40 qoǵamdyq kelisim keńesi bar. Assambleıa quramyna 97 adam kiredi. 
