Mańǵystaýda 4 aıda 25 adam AITV ınfektsııasyn juqtyrǵan

AQTAÝ.QazAqparat – Jyl basynan beri Mańǵystaý oblystyq juqtyrylǵan ımmýn tapshylyǵy sındromynyń aldyn alý jáne oǵan qarsy kúres jónindegi ortalyǵyna sheteldik azamattardy qospaǵanda 25 adam AITV ınfektsııasymen tirkeýge alynǵan. Bul týraly ortalyqtyń bólim meńgerýshisi málim etti, dep habarlaıdy QazAqparat tilshisi.

AITV ınfektsııasynyń 88 paıyzy geteroseksýaldyq baılanysta juqqany anyqtalǵan. 8 paıyzy gomoseksýaldyq baılanysta, al 4 paıyzy anadan balaǵa berilý jolymen juqqany belgili bolǵan.

«AITV ınfektsııasynyń taralýy halyqtyń ómir súrý uzaqtyǵyna, memleket pen óńir halqynyń ekonomıkalyq kórsetkishteri men ómir súrý deńgeıine keri yqpalyn tıgizedi. Ótken 4 aıda jalpy halyq arasynda AITV ınfektsııasynyń aldyn alý boıynsha 156 is-shara ótkizilip, 7235 adam qamtyldy», - dedi Mańǵystaý oblystyq juqtyrylǵan ımmýn tapshylyǵy sındromynyń aldyn alý jáne oǵan qarsy kúres jónindegi ortalyǵynyń bólim meńgerýshisi Amangúl Kemazanova.