Mańǵystaýda 300 balaǵa syılyqtar úlestirildi

MAŃǴYSTAÝ. QazAqparat - 1 maýsymda Aqtaýdaǵy «Mańǵystaý arena» sport saraıynda «Áke, ana jáne men - tatýly otbasymyz» atty sporttyq jáne qaıyrymdylyq aktsııasy ótti.

Otbasylyq úlgidegi oblystyq balalar aýylynyń tárbıelenýshileri, kámeletke tolmaǵandardy beıimdeý ortalyǵy, kópbalaly otbasylardan shyqqan jáne múmkindigi shekteýli balalarǵa arnalǵan «kóńildi starttar», konkýrstar, estafetalar, zýmba bıi uıymdastyryldy. Sondaı-aq balalarǵa táttiler, oıynshyqtar jáne túrli syılyqtar úlestirildi.

Aktsııany oblystyq jáne qalalyq ákimdikter, Mańǵystaý densaýlyq saqtaý basqarmasy, bankter jáne aımaqtyq kompanııalar qarjylandyrdy.

Mańǵystaý oblysynyń ákimi Eraly Toǵjanovtyń atynan aktsııaǵa qatysýshylardy aýdandyq ishki saıasat bólimi bastyǵynyń orynbasary Muhtar Ibraımov quttyqtady.

Oblystyq salaýatty ómir saltyn qalyptastyrý ortalyǵy aktsııanyń 300 kishkentaı qatysýshysyna syılyqtar men oıynshyqtar tabystady.

«Qurmetti balalar! Sizder - úlken baqyttyń kishkene bóligisizder, árbir eresek adamnyń ómirin shynaıy qýanysh pen jylýlyqqa toltyratyn ǵajaıyp jansyzdar. Balalar mahabbat pen qamqorlyqqa, ata-ananyń qamqorlyǵyna muqtaj jáne árbir balanyń júregi bul kishkene baqyttan aıyrylmaýy kerek. Balalar meıramynda árbir balaǵa aýyz birligi myqty otbasyn jáne balalyq shaqty alańsyz ótkizýdi tileımin. Balalardyń kúlkisi elimizdi jarqyratyp, qulpyrtsyn.Mańǵystaýdyń árbir kishkentaı turǵyny deni saý jáne baqytty bolsyn», - dedi Salaýatty ómir saltyn qalyptastyrý ortalyǵynyń atqarýshy dırektory Baný Uzaqbaeva.

Oblystyń densaýlyq saqtaý basqarmasynyń atynan oblystyq balalar aýrýhanasynyń dırektory Amanbek Jumırov quttyqtap: «Osy keremet merekege úles qosqan árbir adamǵa rahmet! «Biz - adambyz - birgemiz» qoǵamdyq birlestigin, onyń kóshbasshysy Imanǵazy Dosmuhambetovty týǵan kúnimen quttyqtaımyz, jáne múmkindigi shekteýli balalarǵa, ata-anasynyń qamqorlyǵynsyz qalǵan balalarǵa úlken kóńil bólgenińiz úshin alǵys aıtamyz», - dedi.

Salaýatty ómir saltyn qalyptastyrý ortalyǵynyń qyzmetkerlerine Aqtaý qalasynyń №2 arnaıy orta mektebi, oblystyq otbasylyq úlgidegi balalar aýyly jáne kámeletke tolmaǵandardy beıimdeý ortalyǵy, «Biz - adambyz - birgemiz» qoǵamdyq birlestiginiń atynan alǵys hattar berildi.