Mańǵystaýda 3 tonnaǵa jýyq bekire balyǵyn úıinde saqtaǵan turǵyn ustaldy

AQTAÝ. QazAqparat – Fort-Shevchenko qalasynda 3 tonnaǵa jýyq bekire balyǵyn úıinde saqtaǵan turǵyn anyqtaldy, dep habarlaıdy QazAqparat tilshisi.

Mańǵystaý oblystyq polıtsııa departamentiniń baspasóz qyzmetiniń habarlaýynsha, Túpqaraǵan aýdandyq polıtsııa bóliminiń kezekshi pýltine Fort-Shevchenko qalasynda jekemenshik úıde bekire tuqymdas balyqty zańsyz saqtaý deregi týraly habarlama kelip túsken.

Tintý is-sharalaryn júrgizý barysynda jeti tońazytqyshtan jalpy salmaǵy 2 tonna 730 keli bolatyn 633 dana bekire balyǵy tabyldy.

«Polıtsııa qyzmetkerleri balyqty tárkiledi. Atalǵan fakti boıynsha QR QK 339-baby 3-bóligi boıynsha qylmystyq is qozǵaldy», -delingen baspasóz habarlamasynda.

Qazirgi ýaqytta sotqa deıingi tergeý amaldary júrgizilýde.