Mańǵystaýda 28 bilim berý uıymy memlekettik attestattaýdan ótpeı qaldy

AQTAÝ. QazAqparat – Mańǵystaý oblysynda jyl basynan beri júrgizilgen memlekettik attestattaýdyń birinshi kezeńinen 28 bilim berý uıymy ótpeı qaldy. Bul týraly oblystyq bilim salasyndaǵy sapany qamtamasyz etý departamentiniń basshysy Esbolat Ómirzaq málimdedi, dep habarlaıdy QazAqparat tilshisi.

«Memlekettik attestattaýda jalpyǵa bilim berý standartynyń oryndalysy qaralady. Onyń ishinde, bilim berý mazmunyna, oqý júktemesine qoıylatyn talaptar tekseriledi. Oqý josparynyń oryndalysy jáne balalardyń bilim deńgeıi baǵamdalady, ıaǵnı 4, 9 jáne 11-synyptardan baqylaý testisi alynady. Attestatsııalanbaǵan mektepterde osy testileýdiń shektik deńgeıinen ótpeı qalǵan oqýshylar boldy. Ekinshi, oqý josparynyń oryndalmaı qalýy jáne materıaldyq-tehnıkalyq bazasynyń tolyq emes bolýyna baılanysty kemshilikter boldy», - dedi Esbolat Ómirzaq óńirlik kommýnıkatsııalar ortalyǵynda ótken brıfıngide.

Atap aıtqanda, 21 mektep, 31 balabaqsha men 1 kolledj memlekettik attestattaýǵa qatysqan. 11 balabaqsha men 16 mektep ekinshi ret tekserýden ótýge májbúr bolǵan. Balabaqshalardy qaıta attestattaý júrgizilip jatyr.