Mańǵystaýda 24 adam qyzylsha aýrýyn juqtyrǵan
AQTAÝ. QazAqparat. 2018 jyldyń jeltoqsan aıynan bastap búginge deıin óńirde 35 qyzylsha aýrýyna kúdikti jaǵdaı tirkelgen, dep habarlaıdy QazAqparat tilshisi.
Mańǵystaý oblysy Qoǵamdyq densaýlyq saqtaý departamentiniń ınfektsııalyq jáne parazıtarlyq aýrýlardy epıdemıologııalyq qadaǵalaý bóliminiń basshysy Gúlshat Shorbasovanyń aıtýynsha, 24 jaǵdaı zerthanalyq túrde anyqtalypty.
«Aımaq boıynsha taldaý jasaǵanda: Aqtaý qalasynda - 6 jaǵdaı, Jańaózen qalasynda - 14 jaǵdaı, Túpqaraǵan aýdany - 1 jaǵdaı, Mańǵystaý aýdany - 1 jaǵdaı, Qaraqııa aýdany - 1 jaǵdaı, Munaıly aýdanynda - 1 jaǵdaı tirkeldi»,-deıdi Gúlshat Shorbasova.
Aýrý jaǵdaılarynyń 83,3% -14 jasqa deıingi balalar arasynan anyqtalǵan. Tirkelgen qyzylsha aýrýlarynyń 70,8 % qyzylsha qarsy ekpemen qamtylmaǵan adamdar arasynan tirkeldi, onyń ishinde 50,0% egý jasyna jetpegen, egýmen qamtylmaǵan 1 jasqa deıingi balalar, 8,3% egý derekteri belgisiz adamdar, 4,2% egýden bas tartqan jáne 8,3% medıtsınalyq kórsetkish boıynsha ekpe almaǵandar.
