Mańǵystaýda 2018-2020 jyldarǵa arnalǵan óńir bıýdjeti bekitildi
«Osy jylǵy bıýdjet túsimderiniń oryndalýy 127 mlrd. teńgeni qurady. Osyǵan oraı, 2018 jylǵa oblys bıýdjetiniń kiristeri 7% ósimmen 137,2 mlrd. teńge kóleminde boljandy. Bul qarajatqa 15 mlrd. teńge kóleminde respýblıkalyq bıýdjetten beriletin nysanaly transfertter men bıýdjettik kredıtter esepke alyndy»,-dedi oblys ákiminiń orynbasary Sholpan Іlmuhanbetova.
Osylaısha, 2018 jylǵa arnalǵan oblys bıýdjetiniń jalpy kólemi 152,2 mlrd. teńgeni quraıtyn bolady. Atalǵan qarajat kelesi salalarǵa bólinbek.
Memlekettik qyzmetkerlerge eńbekaqy tóleýdiń jańa júıesin engizý boıynsha pılottyq jobany iske asyrýǵa 2,5 mlrd. teńge qaralyp otyr. Qazirgi tańda, Memlekettik qyzmet isteri agenttigi «100 naqty qadam» Ult jospary aıasynda, memlekettik qyzmetshilerdiń eńbekaqysyn faktorlyq-baldyq shkala boıynsha tóleý qajet dep otyr. Jalpy, sıpattaǵy memlekettik qyzmet úshin boljanǵan qarjy kólemi 4,6 mlrd. tenge.
Qoǵamdyq tártip pen qaýipsizdikti qamtamasyz etýge 5,3 mlrd. teńge josparlanǵan. Onyń ishinde, Іshki ister organdary qyzmetkerleriniń biliktiligi úshin ústemeaqy mólsherlerin ulǵaıtýǵa jáne laýazymdyq jalaqylaryn kóterýge respýblıkalyq bıýdjetten 426 mln. teńge qarastyryldy.
Bilim berýge de aıtarlyqtaı basymdyq berilmek. Saladaǵy is-sharalardy oryndaýǵa 59,7 mlrd. teńge josparlanǵan. Balalardy mektepke deıingi tárbıemen tolyq qamtýdy qamtamasyz etý maqsatynda «Balapan» salalyq baǵdarlamasy boıynsha qoldaý jalǵaspaq. Oblys boıynsha bóbekjaı sany 117 birlikten 258 birlikke deıin artyp, qamtý kórsetkishi 50%-dan 93%-ǵa ósti. Osyǵan baılanysty, balabaqshalardyń jumysyn qamtamasyz etýge 10,4 mlrd. teńge qaralǵan. Al, orta bilim berýge 40 mlrd. teńge qaraldy. Atalǵan qarajat negizinen úsh aýysymdy oqýdy boldyrmaý maqsatynda jumsalmaq.
Densaýlyq saqtaý salasyna 2,8 mlrd. teńge qaralyp otyr. Damý bıýdjeti boıynsha 150 oryndyq ana men balany qorǵaý ortalyǵynyń qurylysyn aıaqtaýǵa 942 mln. teńge jáne Munaıly aýdanynda 150 oryndyq ortalyq aýrýhana qurylysynyń jobalyq-smetalyq qujatyn túzetýge 10 mln. teńge qarastyryldy.
Mádenıet, sport jáne týrızmge josparlanǵan qarjy 7,8 mlrd. teńgeni quraıdy. Onyń ishinde memlekettik-jekemenshik áriptestigi mehanızmi boıynsha Aqtaý qalasyndaǵy Muz saraıynyń qurylysyn qosa qarjylandyrýǵa - 1,2 mlrd. teńge qaralǵan.
Óńir ekonomıkasy damýynyń mańyzdy baǵyttarynyń biri - aýyl sharýashylyǵy, qorshaǵan ortany qorǵaý jáne jer qatynastary. Kelesi jylǵa josparlanǵan qarjy kólemi 3 mlrd. tenge. Onyń ishinde agroónerkásip keshenin sýbsıdııalaýǵa 1 mlrd.teńge jáne qorshaǵan ortany qorǵaý boıynsha is-sharalarǵa 287 mln. Teńge, «Arýana» asyl tuqymdy túıe satyp alý jobasyn jalǵastyrýǵa 77 mln. teńge josparlanyp otyr.
Mańǵystaýda aýyldyq aımaǵtardaǵy eldi mekenderdi aýyz sýmen qamtý ózekti másele ekeni belgili. Sondyqtan «Aq bulaq» baǵdarlamasy aıasynda jobalardy qarjylandyrýǵa 4 mlrd. teńge kózdelgen. Onyń ishinde 2,3 mlrd. teńge respýblıkalyq bıýdjet transfertteri. Bul qarajatqa kelesi jyly 5 aýdandaǵy 10-nan astam aýyldy sýmen qamtý josparlanyp otyr. Sonymen qatar, Jańaózen kalasyndaǵy sý tazartý ǵımaratynyń, «Qazba-Aqshymyraý» jáne «Basqudyq-Beki» magıstraldi sý qubyrlary qurylysyn qarjylandyrý da josparlanǵan.
Bıýdjet zańnamasyna engizilgen jańa ózgeristerdiń eń mańyzdysy - bıýdjettiń 4-shi deńgeıiniń engizilýi. 2018 jyldyń 1 qańtarynan bastap halyq sany 2 myńnan asatyn eldi mekenderdiń óz derbes bıýdjeti bolady. Oblysta derbes bıýdjet 30 aýylda jáne 1 qalada engizilmek. Derbes bıýdjetke 11 kiris pen 19 shyǵys túrleri beriledi.
Sonymen birge, Premer-Mınıstr sapary aıasynda Mańǵystaý oblysynyń ózekti máseleleriniń Keshendi jospary jasaqtalǵan bolatyn. Josparǵa jalpy quny 97 mlrd. teńge bolatyn 67 joba engizilip, ortalyq quzyrly organdarmen kelisildi.
Jıynda sóz alǵan aımaq basshysy Respýblıkalyq bıýdjetten bólinetin 97 mlrd.teńgeniń aýqymdy qarajat ekenin aıtty.
«9 aı ishinde 1360 tapsyrma berdim. Onyń qazirgi tańda 460-sy oryndaldy. Halyqqa qajetti áleýmettik nysandar salynyp, turǵyndardyń qajettiligine oraı usynystar oryndaldy. Atalǵan somany endi osyndaı mańyzdy jobalardy júzege asyrýǵa qarastyrý kerek. Ásirese, bizde damýy tıis aýyl sharýashylyǵy salasyna kóńil bólý kerek dep sanaımyn»,-dedi.
Sessııada depýtattar da óz usynystaryn jetkizdi. Máselen, Jańaózende qoǵamdyq kólikter sanyn artyryp, oblysta marshrýttar baǵytyn kóbeıtý kerek. Ásirese, «Aqtaý-Beıneý-Atyraý» baǵytyna avtobýstardy júrgizýdi jolǵa qoıý qajet. Sonymen birge, aımaqtaǵy mańyzy bar tasjoldardyń keshendi jobasyn jasaqtaý kerek.
Oblys ákimi Eraly Toǵjanov orynbasarlary men basqarma basshylaryna atalǵan usynystardy muqııat qarap, tıisti sharalar qabyldaýdy tapsyrdy.
