Mańǵystaýda 200-ge jýyq medıtsına qyzmetkeri marapattaldy
Densaýlyq salasynyń damýyna eleýli úles qosqan sala mamandaryna alǵys hattar men vedomstvolyq nagradalar tabys etildi. Atap aıtqanda Qazaqstan Respýblıkasynyń Densaýlyq saqtaý mınıstrliginiń «Densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tósbelgisimen, sondaı-aq densaýlyq saqtaý mınıstrliginiń Qurmet gramotasy tabystaldy.
Halyq densaýlyǵy - elimizdiń strategııalyq maqsattarǵa jetýdegi tabysynyń ajyramas bir bóligi. Kez-kelgen memlekettiń basty qazynasy - adam. Al turaqtylyq pen gúldenýi - onyń densaýlyǵy. Sondyqtan, densaýlyq saqtaý júıesiniń basty maqsaty - sapaly jáne qoljetimdi medıtsınalyq qyzmet kórsetý.
Oblys ákiminiń orynbasary Qanybek Bekbolatuly jáne óńirdiń bas dárigeri Jamal Jamanbaeva densaýlyq saqtaý salasynda aıanbaı qyzmet etip júrgen medıtsına qyzmetkerlerin kásibı merekemen quttyqtady. Aq halatty abzal jandar bir – birine jyly lebizderin bildirdi, al konferents-zaldyń aýasy gúlderdiń hosh ıisine toly boldy.
«Bul bizdiń kásibı merekemiz. Jalpy jylda keń kólemde toılaýshy edik, alaıda qazirgi «Covid-19» indetin dúnıejúzilik densaýlyq saqtaý uıymy pandemııa dep jarııalaǵan soń, burynǵysha barlyǵynyń basyn bosyp toılaý múmkin bolmaı otyr. Alaıda aq halatty abzal jandardyń eńbekterin elemeýge taǵy bolmaıdy, sol sebepti bıyl medıtsınalyq uıymdarǵa aıaqtaı baryp, áriptesterimizdi jumys oryndarynda quttyqtap shyqtyq jáne keıbir qyzmetkerlerdi ózimizdiń basqarmaǵa shaqyryp olardyń eńbekterin atap ótken bolatynbyz», - deıdi Mańǵystaý oblysy densaýlyq saqtaý basqarmasynyń basshysy Jamal Jamanbaeva.
Qazirgi tańda Mańǵystaý óńirinde koronavırýs ınfektsııasyna qarsy 1054 medıtsına qyzmetkeri jumysqa tartylǵan. Jalpy oblys boıynsha medıtsınalyq uıymdarda barlyǵy 8600 aq halatty abzal jandar jumys isteıdi. Dárigerler sany 1900 bolsa onyń 400-ge jýyǵy jekemenshik mekemelerde qyzmet etedi, al medbıkeler sany 5700, kishi medıtsına personalynyń sany 1342 quraıdy.
