Mańǵystaýda 200 eldiń astanasyn jatqa aıtatyn 6 jasar bala turady
Jiger Berikbaıuly otbasymen Mańǵystaýdyń Munaıly aýdanynda turady. №9 mekteptiń 1-synypta oqıdy.
Ájesiniń aıtýynsha, Jiger tek elderdiń astanasy ǵana emes, qaı jerde ornalasqanyn da múdirmeı aıta alady.
«Oǵan qosa, muhıttar, materıkter, Eýropa, Azııa Amerıka, Afrıka qurlyqtary týraly biledi. Qyzyǵýshylyǵy karantın bastalǵanda boldy. Demalys kezinde kórshi úıdiń 5-synypta oqıtyn qyzynan atlas kartasyn surap alyp, oqytaıyn dedik. Solaı ózi ári qaraı ǵalamtordan memleketter týraly izdenip, oqyp ketti»,-deıdi Zıba Táńirbergenova.
Ájesi Jigerdiń 4 jasynan bastap oqýǵa yntasy bar, zerek ekenin baıqap, túrli kitaptar satyp alyp bergen. Osylaısha, daryndy balaqaı úıde óz betinshe saýat ashady. Matematıkaǵa da qyzyǵyp, esepter shyǵarady. Bir qyzyǵy, balabaqshaǵa da, alǵashqy daıyndyq synybyna da barmaǵan. 1-synypqa óz betinshe meńgergen bilimimen birden qabyldanǵan.
Bos ýaqytynda Jiger gadjet, telefon ustamaıdy. Dop oınap, asyq atady.
Telefondy qolyna ustaı qalsa, ǵalamtordan dúnıe júziniń kartasyn, ár memlekettiń prezıdentteri týraly aqparattardy, qandaı el, ol memlekettiń geografııalyq jáne saıası jaǵdaıy týraly málimetterdi oqıdy.
«Sonymen qatar, atlasty qarap otyryp, janýarlar týraly da aqpar izdeıdi. Joǵalyp bara jatqany, oǵan ne sebep, nemen qorektenedi, bir sózben aıtqanda barlyǵyn bilýge umtylady»,-deıdi Zıba ájeı.
6 jasar Jiger saıahatshy bolýdy armandaıdy.
«Bolashaqta el, jer aralap, ata-anamdy birge aparýdy armandaımyn. Maǵan ásirese, tabıǵaty sulý, taýlary bıik, jap-jasyl Shveıtsarııa unaıdy. Qazir til úırenip júrmin»,-deıdi Jiger.
Qazir zerek balaqaı orys, aǵylshyn tilin meńgerýde. Arab tilindegi súrelerdi, Allanyń 99 esimin jattap alǵan. Muhammed paıǵambardyń ómir joly týraly oqyǵandy jaqsy kóredi.
Bir ereksheligi, telefonnan oıyn oınap, mýltfılm kórýge qyzyǵýshylyǵy joq.
Jigerdiń ata-anasy bolashaqta ulynan úlken úmit kútedi.