Mańǵystaýda 20 adam salmonellez aýrýyn juqtyrǵan
AQTAÝ. QazAqparat – Mańǵystaýda jaz bastalǵaly 20 adam salmonellez aýrýymen tirkelgen. Naýqastardyń basym bóligi – áskerıler. Aýrý juqtyrǵandar arasynda eki bala bar, dep habarlaıdy QazAqparat tilshisi.
«Aýrý sarbazdar arasynda sáýir aıynda tirkelgen. Aldymen 13 jaǵdaı tirkelse, keıin aýrý tez taralyp, naýqastar sany 20-ǵa ósken. Aǵzaǵa salmonella bakterııasy engen soń, dene qyzýy kóterilip, ishi isip, qurysyp qalady. Sodan antıbıotık qabyldaǵannan keıin 1 apta ishinde adam qalpyna keledi. Mysaly, aýrý adam qoǵamdyq tamaqtandyrý qyzmetkeri bolsa, tamaq pisirý kezinde basqalarǵa da juqtyrýy múmkin», – deıdi Mańǵystaý oblysy boıynsha Sanıtarlyq-epıdemıologııalyq baqylaý departamenti basshysynyń orynbasary Berdibek Saraltaev.
Sanıtarlyq epıdemıologtar qoǵamdyq oryndarda azyq-túlik ónimderin, onyń ishinde jemis-jıdek pen kókónisti satyp alǵanda, quramy men jasalý merzimine, syrtqy túrine erekshe nazar aýdarý keregin eske salady.
Salmonellez – salmonella tobyna jatatyn, kóptegen qozdyrǵysh týdyratyn jiti ishek aýrýy.
Ǵalymdar salmonellalardyń 700-den astam túrin anyqtaǵan. Olar qorshaǵan ortaǵa tózimdi, tómen temperatýrada uzaq saqtalady. Aýrý qozdyrǵyshtary taǵamda, ásirese jumyrtqada, sary maıda, sútte jáne et ónimderinde tez kóbeıedi.
