Mańǵystaýda 17 myńnan astam kásipkerge salyqtyq jeńildik jasaldy
Bul jóninde qoǵamdyq kommýnıkatsııa ortalyǵynda ótken brıfıngte Mańǵystaý oblysynyń ákimi Serikbaı Trumov aıtyp berdi.
El aýmaǵynda tótenshe jaǵdaı rejımi aıaqtalǵanymen ahýalǵa baılanysty Mańǵystaý oblysynda da karantın rejımi men shekteý sharalary jalǵasýda. Óńirdegi aýdan, qalalardaǵy epıdemologııalyq jaǵdaıǵa baılanysty karantındik sharalardy kezeń-kezeńimen jeńildetý jumystary júrgizilip keledi. Qazirgi tańda birqatar nysandardyń jumysyna ruqsat berildi.
«Bul jeńildetý sharalary indettiń joıylǵandyǵyn bildirmeıdi. Halyqtyń, turǵyndardyń densaýlyǵyna áli de qaýip bar. Sondyqtan, kúndelikti ómirde saqtyq sharalaryn qatań ustanǵan jón.
Engizilgen shekteý sharalaryna salǵyrttyq tanytyp, sanıtarlyq talaptardy oryndamaı, salǵyrttyq tanytyp júrgen azamattar da bar. Bundaı azamattarǵa tıisti ákimshilik shara alynýy tıis. Aqtaý, Jańaózen qalalary men Beıneý aýdanynda da karantın rejımi tolyǵymen alynǵan joq»,-dedi Serikbaı Trumov.
Qazirgi tańda, óńirde birqatar kásipkerlik nysandardyń jumysyna ruqsat berilip, keıbir shekteýlerge ózgerister engizilgenimen, indetke qarsy sharalar qatań saqtalýy mindettelip otyr.
S.Trumovtyń aıtýynsha, tótenshe jaǵdaı kezeńinde Úkimet tarapynan qabyldanǵan qoldaý sharalary Mańǵystaý oblysynda áleýmettik-ekonomıkalyq turaqtylyqty saqtaýda óz nátıjesin berip otyr. Barlyq áleýmettik kómek, eńbekaqy, tıisti qoldaýlar ýaqytyly júrgizilýde. Onyń ishinde medıtsına salasynyń qyzmetkerlerine de memleket basshysynyń tapsyrmasyna sáıkes tólemder de der kezinde berilýde.
- buǵan deıin aıtylǵandaı tabys kózin joǵaltqan 153 myńnan astam adamǵa 42 500 teńgeden memlekettik qoldaý tólendi;
- «Biz birgemiz» partııalyq qaıyrymdylyq jobasy aıasynda 13 myńnan astam januıaǵa 50 myń teńgeden kómek berildi jáne bul shara ári qaraı da jalǵasatyn boldy;
- Az qamtylǵan otbasylar úshin sáýir, mamar aılaryndaǵy kommýnaldyq qyzmetterge tólemderin óteýge 2,2 mlrd. teńge qarjy qarastyryldy;
- Jumyspen qamtý sharalaryna da Úkimet tarapynan qoldaý kórsetilip, «Jumyspen qamtýdyń jol kartasy» qabyldandy. Baǵdarlama aıasynda óńirde 144 joba iske asyrylyp, 8 500 jumys orny qurylatyn bolady,-dedi oblys ákimi.
Úkimet tarapynan kásipkerlik salasyna da aıtarlyqtaı qoldaý sharalary kórsetilýde.
Týrızm, qoǵamdyq tamaqtandyrý jáne qonaq úı qyzmetteri salasyndaǵy kásipkerler múlik salyǵynan bosatyldy. Mıkro, shaǵyn jáne orta kásipkerlik sýbektileri úshin barlyq salyqtar boıynsha tólemder merzimi uzartyldy.
Jalpy alǵanda, oblys boıynsha jyl sońyna deıin 17 myńnan astam shaǵyn jáne orta bıznes ókilderine salyq alymyna jeńildikter berilip otyr.
Mańǵystaý oblysynyń ekonomıkasy munaı salasyna tikeleı táýeldi ekeni belgili. Qazirgi tańda álemdik naryqtaǵy munaı baǵasynyń turaqsyzdyǵy bizdegi munaı óndirýshi iri kompanııalardyń qyzmetine de keri áserin tıgizýde. Sondyqtan biz munaı shıkizatyna táýeldilikti azaıtý baǵytynda ekonomıkany ártaraptandyrý, shıkizattyq emes salalardyń damýyna tyń serpin beretin negizgi baǵyttardy aıqyndadyq. Olar – óńdeý ónerkásibi, agroónerkásip kesheni, servıstik ekonomıka, onyń ishinde týrızm, saýda, kólik-logıstıkasy. Atalǵan salalardyń negizgi damý baǵyttary boıynsha arnaıy jospar jasaqtalyp, ár baǵyt boıynsha jyl sońyna deıin qol jetkizilýi tıis mejeler belgilendi.
«Atalǵan indet órshigen kezde biraz másele qoǵam ókilderiniń belsene qatysýymen jáne eren eńbekteriniń arqasynda sheshimin tapty. Sonyń ishinde medıtsına men quqyq qorǵaý organdary jáne qorǵanys salasy qyzmetkerleriniń eńbekterin erekshe aıtqym keledi»,-dedi oblys ákimi.