Mańǵystaýda 13,7 mlrd teńgeniń ónimi óndirildi
MAŃǴYSTAÝ. QazAqparat - 2017 jyly Mańǵystaýda 13,7 mlrd teńgeniń ónimi óndirilgen. Oblys 108 paıyzben respýblıka boıynsha 1 orynǵa turaqtady. Alaıda, munymen shektelýge bolmaıdy. Bul týraly Mańǵystaý oblysynyń ákimi Eraly Toǵjanov aıtty, dep habarlaıdy QazAqparat.
Elbasy tapsyrǵandaı bul salada eksportty arttyryp, kooperatıv jumysyn jandandyrý kerek.
Óńirde 500 myńnan astam mal basy bar. Onyń ishinde jylqy sany kóp. Ásirese, Beıneý, Mańǵystaý, Túpqaraǵan aýdanynda fermerler sharýashylyǵyn órkendetip otyr. Biraq iri qara baǵýshylar azaıǵan. Sondyqtan bıyl mal ónimi ónimdiligin arttyrý úshin memleket sharýalarǵa birshama sýbsıdııa bergen. Máselen, 2016 jyly 38 mıllıonǵa qoldaý kórsetilse, 2017 jyly bul soma 2 esege artyp, 60 mıllıon 300 myń teńgege jetken.
Aýyl sharýashylyǵyndaǵy negizgi másele - sý tapshylyǵy. Sondyqtan sharýalar qudyq qazyp, malyn sýarady. Ótken jyly eldi-mekenderde 59 qudyq bolsa, bıyl 1 qudyq qazylǵan.
Aımaqtaǵy egin sharýashylyǵy da órkendep kele jatyr. Byltyr 1100 ga egistik bolsa, osy jyly 1200 ga egistik alqabyna kókónis ósirilýde. Ásirese, jylyjaı sany artqan. Byltyr 27, al bıyl 30 jylyjaı bar.
Óńir basshysy qoıǵan negizgi mindet - aýyl sharýashylyǵy ónimderiniń ónimdiligin arttyrý. Mal basy sanyn ósirý. Egin alqabyn keńeıtip, jylyjaı sanyn kóbeıtý. Sondyqtan bıyl balamasyz «Nurkapıtal» jobasy júzege asýda. Óz kásibin júrgizemin degen sharýagerler bar bolǵany 1%-ben nesıe ala-alady.
Áıgerim Ashyqbaeva
