Mańǵystaýda 121 kásipker 1 paıyzben nesıe aldy

AQTAÝ. QazAqparat - Mańǵystaý oblysynda kásipkerlikti qoldaıtyn «Nur-Kapıtal» baǵdarlamasyna suranys artyp jatyr. Búginde atalǵan «Nur-Kapıtal» baǵdarlamasy aıasynda 121 joba úshin 2,4 mlrd. teńgege nesıe alynyp, myńnyń ústinde jańa jumys orny quryldy,-dep habarlaıdy QazAqparat tilshisi.

Bul baǵdarlamanyń ereksheligi - kásipkerlerge 1% ústemaqymen nesıe alyp, bıznes bastaýyna múmkindik beredi.

Sonyń ishinde, kósh bastap turǵan Jańaózen qalasynda 38 joba, Munaıly aýdanynda 44 joba, Beıneý aýdanynda 12 joba, Túpqaraǵan aýdanynda 11 joba, Mańǵystaý adanynda 9 joba, al Qaraqııa aýdanynda 7 joba júzege asyryldy.

Joba aıasynda «ÓzenMunaıGaz» AAQ-tan 900 mıllıon teńge jáne «Damý» qorynan 1,8 mlrd. teńge qarajat bólingen. Oblystyń kásipkerlik salasyn qoldaý maqsatynda jalpy quny 2,7 mlrd. teńge bolatyn nesıe resýrstary baǵyttaldy. Bul qarajat AQ «Forte bank», AQ «Sberbank», AQ «Qazaqstan Halyq Banki», sondaı-aq, AQ «Bank Tsentr Kredıt» bankteri arqyly 8,5% bólinip, jergilikti bıýdjet boıynsha 7,5 paıyzben sýbsıdııalanǵan. Sáıkesinshe, sońǵy qaryz alýshy úshin paıyzdyq mólsherleme 1% quraıdy.

Beriletin qarajat ınvestıtsııalarǵa (negizgi quraldardy satyp alý jáne modernızatsııalaý) nesıe somasynyń 30 paıyzynan asyrmaýdy maqsat etip, ınvestıtsııalyq nesıe aıasynda aınalym kapıtalyn tolyqtyrýǵa bólinedi.

Nesıe merzimi: ınvestıtsııalar úshin - 7 jylǵa deıin, al aınalym qarajattaryn tolyqtyrý úshin - 3 jylǵa deıin.

Nesıe alýshy «Bıznestiń jol kartasy 2020» bıznesti qoldaý men damytýdyń memlekettik baǵdarlamasy aıasynda 85% deıin memlekettik kepildik ala alady jáne oǵan nesıe turaqty jańa jumys oryndaryn quraıtyn jaǵdaıda ǵana beriledi.

Óndiris, aýyl sharýashylyǵy, týrızm, qyzmet kórsetý – «Nur-Kapıtal» jobasynyń negizgi baǵyttary bolyp sanalady, sáıkesinshe barlyq jobalar Óńirlik úılestirý keńesiniń ruqsatynan ótedi.